Жинст сумын иргэд орон нутгийн хөгжлийн асуудлаар саналаа илэрхийллээ

Монгол Ардын намын Удирдах зөвлөлийн Ажлын албанаас орон даяар зохион байгуулж буй “Ардын нам-Ард түмэндээ” аяны хүрээнд Улсын Их Хурлын гишүүн Н.Батсүмбэрэлээр ахлуулсан ажлын хэсэг Баянхонгор аймгийн Жинст суманд ажиллалаа.

Багийн бүрэлдэхүүнд Баянхонгор аймгийн Засаг дарга бөгөөд МАН-ын хорооны дарга Э.Энхбат, “Гишүүн төвтэй нам” Е-4 стратегийг хөгжүүлэх бодлогын хорооны Нарийн бичгийн дарга Г.Өлзийбаатар, МАН-ын Бага хурлын гишүүн Б.Энхтүвшин, Б.Батбаяр, МАН-ын Олон нийттэй харилцах хэлтсийн Улс төрийн ажилтан С.Түвшинзаяа нар багтаж, орон нутгийн намын гишүүд, дэмжигчидтэй уулзалт, хэлэлцүүлэг зохион байгуулсан юм.

Уулзалтад  намын 130 гаруй гишүүн, дэмжигч оролцож, Засгийн газрын бодлого, үйл ажиллагаа, Монгол Ардын намын хөгжлийн бодлогыг тодорхойлох “Е-4 стратеги”, намын даргын дэвшүүлж буй “Чөлөөлье” санаачилга, “E-nam 3.0” платформын талаар мэдээлэл авч, санал бодлоо солилцлоо.Энэ үеэр иргэд, гишүүд дэмжигчид орон нутгийн болон бүсчилсэн хөгжлийн бодлого, хөдөлмөр эрхлэлт, мал аж ахуй, жижиг, дунд үйлдвэрлэлийг дэмжих арга хэмжээний талаар мэдээлэл сонсож, тулгамдсан асуудлуудаа хөндөн илэрхийлэв.

Баянхонгор аймаг нь нийслэл Улаанбаатар хотоос 630 орчим км зайд оршдог, 90 мянга гаруй хүн амтай. Говь, хангай, тал хээрийн бүсийг хослуулсан байгалийн өвөрмөц тогтоцтой тус аймаг нь мал аж ахуй, уул уурхай, аялал жуулчлал, сэргээгдэх эрчим хүчний хөгжлийн өндөр нөөц боломжтой бүс нутаг юм.