Ш.Эрдэнэбат: Ноолуурыг эс тооцвол арьс ширийг хогийн цэг дээр хаяж байна

Монгол Ардын намын Удирдах зөвлөлийн Ажлын албанаас зохион байгуулж буй “Ардын нам – Ард түмэндээ” аяны хүрээнд гишүүд дэмжигчидтэйгээ хийж буй уулзалт, хэлэлцүүлэг Архангай аймгийн Цэцэрлэг суманд үргэлжиллээ.Уулзалт, хэлэлцүүлэгт Архангай аймгийн ИТХ-ын дарга П.Гомбодорж, Архангай аймгийн Засаг даргын орлогч Ч.Батнайрамдал Цэцэрлэг сумын МАН-ын хорооны дарга 

Ш.Эрдэнэбат болон сумын намын хорооны 5 үүрийн нийт 140 гаруй гишүүд дэмжигчид оролцож байна.

Уулзалтад УИХ-ын гишүүн, УИХ-ын Ёс зүйн хорооны Дэд дарга Б.Хэрлэн Засгийн газраас авч хэрэгжүүлж буй бодлого, үйл ажиллагаа, “Эрх чөлөөний дөрвөн зам, дөрвөн чөлөөлөлт” болон нийгэм, эдийн засгийн голлох төслүүдийн явц, хүлээгдэж буй үр дүнгийн талаар нэгдсэн танилцуулга хийлээ.

МАН-ын намын Орон нутаг намын хөгжлийн хэлтсийн дарга Б.Галсан намын хөгжлийн бодлогыг тодорхойлох "Е-4 стратеги"-ийг гишүүдэд танилцуулж, E-nam 3.0-г хэрэглээнд нэвтрүүлж, намын анхан шатны гишүүдийн оролцоог нэмэгдүүлэх ач холбогдлын талаар танилцуулав.

Мөн Архангай аймгийн Засаг даргын орлогч Ч.Батнайрамдал Архангай хөгжлийн төлөвлөлт, хэрэгжилт, үр дүнгийн талаарх танилцууллаа. Ажлын хэсгийн танилцуулгын дараа иргэд, намын гишүүд дэмжигчид саналаа илэрхийлэв.

Цэцэрлэг сумын МАН-ын хорооны дарга Ш.Эрдэнэбат малчин иргэдийн нийгмийн даатгалыг шимтгэлийг бүтэн болгох тухай хууль огт хэрэгжихгүй өнгөрсөн гэх асуудлыг хөндлөө. Үүнээс болж  малчин иргэд тэтгэврийн даатгалдаа хамрагдаж чадахгүй байгааг УИХ, Засгийн газарт уламжилж өгөхийг хүслээ.

Мөн сүүлийн жилүүдэд малын түүхий эд үнэгүйдсэн. Малын мах, ноолуурыг эс тооцвол арьс ширийг хогийн цэг дээр хаяж байна. Тиймээс Монгол Ардын намын дарга, Ерөнхий сайд Н.Учралын санаачилсан “Нарлаг монголын малчин” хөтөлбөрт малын гаралтай түүхий эдийн үнийг өсгөх бодлогын шийдлийг тусгах нь зүйтэй гэв.

Уулзалт, хэлэлцүүлгийн дараа намын идэвх зүтгэлтэй, тэргүүний гишүүдийг шагнаж урамшууллаа.