“Сэлбэ дэд төв”-ийн орон сууцнуудын ахуйн хэрэглээний усыг зэс шугам хоолойгоор холбож шийднэ

Сэлбэ дэд төв нь нийслэлийн Сүхбаатар дүүргийн 14 дүгээр хороо, Чингэлтэй дүүргийн 14, 18 дугаар хорооны нутаг дэвсгэрийг хамарсан томоохон бүтээн байгуулалт юм. Энэхүү төслийг хэрэгжүүлэхийн тулд нийт 158 га газрыг чөлөөлөн, дахин төлөвлөж, инженерийн дэд бүтцийн бүрэн шийдэлтэйгээр хэрэгжүүлж байна.

Сэлбэ дэд төвд орон сууцны 113 барилга баригдахаар төлөвлөгдсөн бөгөөд одоогийн байдлаар барилгын үндсэн бүтээц нь 9 хүртэлх давхартаа орж, орон сууцны иж бүрэн цогцолбор хорооллын нийт гүйцэтгэл 32.9 хувьтай байгаа аж. Төслийн талбайд өнөөдрийн байдлаар 2067 хүн 102 машин механизм, техниктэйгээр ажиллаж байна.

Тус төсөл нь олон онцлог давуу талтай. Тухайлбал, дулааныг нь 63 МВт-ын хүчин чадал бүхий “Дамбадаржаа” цахилгаан станцаас хангах бол орон сууцнуудын хэрэглээний усыг зэс шугам хоолойгоор шийдэх төлөвлөлтийг тусгасан. Ингэснээр иргэдийн аюулгүй, эрүүл амьдрах орчныг бүрдүүлж байна. Мөн орон сууцнуудын дээвэр дээр нарны панел байрлуулж, орцны гэрэлтүүлэг, лифт зэрэг нийтийн хэрэглээний эрчим хүчийг хэмнэлттэйгээр шийдэх зэрэг нийслэлд анхдагч томоохон хэрэгцээг энэ төсөлд шингээжээ.

“Сэлбэ 20 минутын хот” төсөл нь явган алхах, дугуйгаар явах, нийтийн тээврээр зорчихыг дэмжсэнээр хувийн автомашины хамааралтай байдлыг бууруулна. Мөн байгаль орчны хувьд, 15000 нүхэн жорлонг устгаж, 12000 яндан бууснаар гэр хорооллоос үүдэлтэй агаарын бохирдол 7.7 хувиар, хөрсний бохирдол 6 хувиар буурна. Мөн тус төслийн хүрээнд гадаргын усны нөөцийн урсацыг орон зай, цаг хугацааны хүчин зүйлийг тооцон хиймэл нуур, усан сан, цөөрөм, хүнхээл байгуулан, байгаль экологийн таатай орчинг бүрдүүлнэ.