Улаанбурхан өвчний 11 тохиолдол нэмэгджээ

Эрүүл мэндийн байгууллагуудын мэдээлснээр 2026 оны 6 дугаар сарын 9-ний байдлаар улаанбурхан өвчний батлагдсан 11 шинэ тохиолдол бүртгэгдэж, нас баралт шинээр бүртгэгдээгүй байна. Шинээр илэрсэн тохиолдлуудын 9 нь нийслэлд, 2 нь орон нутагт бүртгэгджээ.

Улсын хэмжээнд нийт батлагдсан тохиолдлын тоо 15,375-д хүрсэн бөгөөд үүнээс 12,290 нь Улаанбаатар хотод, 3,085 нь орон нутагт бүртгэгдсэн байна. Нийт 20 хүн уг өвчний улмаас нас баржээ.

Одоогоор 76 хүн эмчилгээ, хяналтад байгаа бөгөөд 58 нь эмнэлэгт, 18 нь гэрээр эмчлүүлж байна. Эмчлүүлж буй иргэдийн 42 нь нийслэлд, 16 нь орон нутагт байна.

Өвчлөлийн түвшинг аймаг, нийслэлээр авч үзвэл 10,000 хүн амд ногдох өвчлөл хамгийн өндөртэй бүсүүдэд тохиолдлын тоо харьцангуй өндөр хэвээр байгаа бөгөөд улсын хэмжээнд 5 зөөвөрлөгдсөн тохиолдол бүртгэгджээ.

Мөн улаанбурханы дэгдэлт 468 дахь өдрөө үргэлжилж байгаа талаар албаныхан мэдээллээ. Насны бүлгээр нь авч үзвэл өвчлөл бага насны хүүхдүүдийн дунд хамгийн өндөр байгаа бөгөөд өсвөр насныхан болон залуу насныхны дунд мөн бүртгэгдсээр байна.