Вакцин нь нэвтрээгүй шүлхийн хэв шинжээр 779 мал өвчлөөд байна

Шүлхий нь салаа туурайтай мал амьтныг өвчлүүлдэг вирусийн гаралтай гоц халдварт өвчин бөгөөд халдварлах чадвар өндөр, гадаад орчинд удаан хугацаанд идэвхтэй хадгалагддаг онцлогтой юм.

Монголд өмнө нь бүртгэгдэж байгаагүй шүлхийн САТ-1 хэв шинжийн дэгдэлт гарч, баруун бүсийн аймгуудад нөхцөл байдал хүндрээд байна. Анхны тохиолдол өнгөрсөн тавдугаар сарын 22-нд Баян-Өлгий аймгийн Алтай суманд бүртгэгдэж, улмаар Ховд аймгийн зарим суманд халдвар тархжээ.

Одоогийн байдлаар Баян-Өлгий, Ховд аймгийн гурван суманд нийт 779 толгой мал өвчилсөн бөгөөд өвчилсөн малыг устгах арга хэмжээ авч байна. Устгалын ажил 77 гаруй хувьтай үргэлжилж байгаа ч ган зудын хүндрэлээс дөнгөж гарч буй малчдад хүнд цохилт болж буй.

Мэргэжлийн байгууллагуудын мэдээлснээр САТ-1 нь Монголд өмнө нь илэрч байгаагүй, өндөр халдварлах чадвартай шүлхийн омог юм. Энэхүү хэв шинжийн эсрэг вакцин одоогоор манайд нэвтрээгүй бөгөөд олон улсын лабораторийн баталгаажуулалт, вакцин татан авах асуудал шийдлээ хүлээсээр байна.

Тус өвчний томоохон дэгдэлт энэ оны дөрөвдүгээр сард БНХАУ-ын Шинжаан-Уйгурын өөртөө засах орон болон Ганьсу мужид бүртгэгдсэн бөгөөд сарын дараа Монголд илэрлээ. Халдвар гарсан бүсүүд бүгд хил орчмын сумд байгаа нь өвчний эх үүсвэрийн талаар хардлага төрүүлж буй юм.

Нөхцөл байдалтай холбогдуулан Увс, Говь-Алтай аймаг хөдөлгөөний хязгаарлалт тогтоож, хяналтын пост ажиллуулж эхэлжээ. Харин вакцины нийлүүлэлтийг яаралтай шийдвэрлэх чиглэлээр ОХУ-тай хэлэлцээ хийсэн талаар ХХААХҮ-ийн сайд мэдээлсэн байна.