ИРГЭД: Нөөцийн мах авах гэсэн биш өдөржин урт дараалалд зогсож ажлаа алдаж байна

Хотын даргыг суудлаас нь огцруулах хэмжээнд хүрсэн махны үнийн өсөлтөд Засгийн газар анхаарал хандуулж, үнийг тогтворжуулах арга хэмжээ авч эхэлсэн. Үүний хүрээнд нөөцийн махыг иргэдэд килограмм тутмыг нь 13-15 мянган төгрөгөөр худалдаалах шийдвэр гаргасан юм.

Нөөцийн махны өргөтгөсөн худалдааг энэ сарын 19-нөөс эхлэн нийслэлийн төвийн зургаан дүүрэгт зохион байгуулж байна. Бид Сүхбаатар дүүргийн “Хангай” хотхоны гадна талбайд байрлах борлуулалтын цэг дээр ажиллаласан юм.

Тус цэг дээр урт дараалал үүсэж, иргэд өглөөнөөс хойш 3-4 цаг дугаарлан зогсож байв. Иргэдийн зүгээс нөөцийн махны үнэ харьцангуй боломжийн байгаа ч хүртээмж, зохион байгуулалт муу байгааг шүүмжилж, өдөржин оочерлохгүйгээр дэлгүүрүүдээр тогтмол худалдаалах шаардлагатай байгааг хэлэв.

Нөөцийн мах худалдаалах цэгүүд:

• Баянгол дүүрэгт “Байгаль эх” цогцолборт, 

• Баянзүрх дүүрэгт Жуковын талбайд, 

• Чингэлтэй дүүрэгт “Алтжин бөмбөгөр” худалдааны төвийн гадна талбайд, 

• Хан-Уул дүүрэгт Төв цэнгэлдэх хүрээлэнд, 

• Сонгинохайрхан дүүрэгт “Цамбагарав” худалдааны төвийн гадна талбайд, 

• Сүхбаатар дүүрэгт “Хангай” хотхоны гадна талбай

Өргөтгөсөн худалдаагаар нөөцийн махыг анх гэрээнд тусгасан үнээр худалдаалах бөгөөд нэг килограмм үхрийн махыг 15 мянган төгрөгөөр, хонины махыг 13 мянган төгрөгөөр тус тус худалдаална. Мөн ирэх Лхагва гаригаас эхлэн сүлжээ дэлгүүрүүдээр, Пүрэв болон Баасан гаригаас гэрээт хүнсний дэлгүүрүүдээр нөөцийн махыг дээрх үнээр худалдаалж эхлэх аж.