А.Ариунзаяа: Махны нөөцийн асуудал Х.Нямбаатарын буруу биш

Нөөцийн махны асуудлыг дан ганц Нямбаатарын буруу мэтээр харах нь өрөөсгөл юм. Энэ асуудлыг илүү өргөн хүрээнд, бодит нөхцөл байдал болон зах зээлийн нөлөөлөлтэй нь хамт авч үзэх хэрэгтэй. Нямбаатар нийслэлийн Засаг даргаар томилогдсоноосоо хойш хийж хэрэгжүүлсэн ажлууд, хотын түгжрэл, дэд бүтэц, нийтийн тээвэр зэрэг олон чиглэлд гарсан ахиц дэвшлийг хамтад нь дүгнэж байж бодит үнэлгээ өгөх ёстой. Миний хувьд Нямбаатар ажлаа сайн хийсэн гэж бодож байна.

Өнөөдөр Ерөнхий сайд Үндсэн хуулиар олгогдсон бүрэн эрхийнхээ хүрээнд нийслэлийн Засаг даргыг хариуцлага алдсан, зохион байгуулалтыг хангалтгүй хийсэн гэх үндэслэлээр чөлөөлөх захирамж гаргасан талаар мэдээлэл өглөө. Харин миний хувьд өнгөрсөн баасан гарагаас эхлэн нөөцийн махыг зориудаар гаргахгүй байх, хомсдол үүсгэсэн мэт нөхцөл бүрдүүлэх, үнийг зохиомлоор өсгөх шинжтэй үйлдэл ажиглагдсан гэж харж байна.

Тиймээс энэ асуудлыг улс төрийн өнгө аясаар бус, бодит нөхцөлөөр нь шалгаж тогтоох хэрэгтэй. Хэрэв үнэхээр зохион байгуулалттайгаар зах зээлд нөлөөлсөн, хиймэл хомсдол үүсгэсэн бүлэглэл, хүмүүс байгаа бол Тагнуулын ерөнхий газар болон холбогдох байгууллагууд хяналт шалгалтаа явуулж, хариуцлага тооцох ёстой. Нийгэмд бухимдал, хомсдол үүсгэж байгаа асуудлын үнэн шалтгааныг ил болгож, эцэслэн мухарлах нь чухал байна.