Хүмүүн сургуулиас Гранд Мед эмнэлгийн уулзвар хүртэл 780 метр авто зам барина

Л.Бямбажав

2026/05/15

Нийслэлийн Засаг дарга бөгөөд Улаанбаатар хотын Захирагч Х.Нямбаатар болон холбогдох албаныхан Хан-Уул дүүргийн 11 дүгээр хороонд ажиллалаа.

Энэ үеэр нийслэлийн Засаг дарга бөгөөд Улаанбаатар хотын Захирагч Х.Нямбаатар “Зайсангийн аманд нийтийн орон сууц болон амины орон сууц олноор барьж, суурьшлын бүс болсон. Барилга байгууламж нэмэгдэж байгаа ч хүүхдүүд сурч хөгжих сургууль, цэцэрлэгийн хүрэлцээ хангалтгүй байна. Тухайлбал, Зайсангийн аманд үйл ажиллагаа явуулж буй ганц сургууль нь Хүмүүн сургууль. Тус сургуульд 500 орчим хүүхэд суралцдаг бөгөөд ойр орчмын бүх хүүхдийг хамруулах боломжгүй. Иймээс Хан-Уул дүүргээс сонгогдсон НИТХ-ын төлөөлөгчдийн гаргасан саналын дагуу Зайсангийн аманд нэг сургууль, нэг цэцэрлэг барих ажлыг эхлүүлэхээр төлөвлөж байна.

Мөн Зайсангийн ам руу ордог ганц зам байдаг. Энэ замыг холбоос замтай болгох зорилгоор Хан-Уул дүүргийн 11 дүгээр хороо, Зайсан орчимд хоёр байршилд нийт 1.9 км авто зам барина. Өнгөрсөн хавар сургууль, цэцэрлэг болон авто зам барих газрын чөлөөлөлтийг хийсэн. Тавдугаар сарын 30-наас өмнө сургууль, цэцэрлэгийн барилгын ажлын гүйцэтгэгчийг шалгаруулж, энэ онд ажлыг эхлүүлж, ирэх жилээс хүүхдүүдээ хүлээн авч эхэлнэ. Мөн авто замыг энэ оны наймдугаар сард ашиглалтад оруулна” гэв.
Нийслэлийн Баруун бүсийн Зам засвар, арчлалтын газрын ерөнхий инженер Б.Түвшинмөнх “Манай байгууллага Хан-Уул дүүргийн 11 дүгээр хороо, Зайсан орчимд хоёр байршилд нийт 1.9 км авто зам барина. Эхний байршил нь Хийморийн овооны арын замаас Ар Зайсангийн гудамж хүртэл 1.1 км үргэлжилнэ. Харин хоёр дахь байршил нь Тэнгэр рашааны гудамжнаас Хүмүүн сургуулийн зүүн урд талаар үргэлжилж, Ар Зайсангийн гудамжтай холбогдох 780 метр урт авто зам байна. Тус зам ашиглалтад орсноор Хан-Уул дүүргийн 11 дүгээр хорооны замын ачаалал буурч, Уулын замын нэвтрүүлэх чадвар сайжрах юм. Замыг энэ оны наймдугаар сарын 1-нд ашиглалтад оруулна” гэв.

Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна

Шинэ мэдээ