Дойче шуле сургууль төлбөрөө үндэслэлгүйгээр 50-56 хувь нэмснийг эцэг эхчүүд эсэргүүцлээ

Эцэг эхчүүдийн зүгээс сургалтын төлбөрийн нэмэгдэлтэй холбоотойгоор тодорхой, ил тод нээлттэй тайлбар хийхийг шаардаж байна гэлээ. Тэдний хэлж буйгаар, сургуулиас “багш нарын цалин 50 хувь нэмэгдсэн учраас төлбөр нэмэгдсэн” гэх ерөнхий тайлбар өгсөн боловч яг ямар зардал хэдэн төгрөгөөр өссөн, ямар тооцооллоор нэмэгдэл гарсныг огт танилцуулаагүй байна.

Мөн эцэг эхчүүдийн зүгээс “Манай хүүхэд энэ сургуулийг төгсөнө гэж итгээд элссэн, жилийн дунд гэнэт өндөр нэмэгдэл гарна гэж төсөөлөөгүй” хэмээн бухимдаж байгаа юм. Зарим сургуулиас эхлээд 30 хувийн нэмэгдэлтэй мэдээлэл өгч байсан ч дараа нь шууд 50 хувь нэмэгдүүлэх тухай цахим шуудан илгээсэн талаар дурдсан байна. Түүнчлэн “Бусад сургуулиуд ийм хэмжээний өсөлт хийгээгүй байхад манай сургууль хамгийн өндөр нэмэгдэл хийж байна” гэв. 

Эцэг эхчүүдийн хамгийн их шүүмжилж буй асуудал нь сургуулийн удирдлагуудтай уулзаж, тайлбар авах боломжгүй байгаа явдал юм. Тэд энэ жилийн төлбөрөө бүрэн төлж дууссан байхад ирэх жилийн сургалтын төлбөрийг урьдчилан нэхэж эхэлсэн нь дарамт болж байна гэсэн юм. 

Харин Боловсролын сайд Л.Энх-Амгалан энэ асуудалд байр сууриа илэрхийлэхдээ: “Үнэ нэмэгдэх тодорхой шалтгаантай байх ёстой. Яагаад нэмэгдүүлж байгаагаа ил тод тайлбарлаж, үндэслэлээ хамгаалах хэрэгтэй. Хэрэв үнэхээр зайлшгүй нөхцөл байдал үүссэн бол түүнийгээ нотолж чадвал зөвшөөрнө. Харин үндэслэлгүйгээр үнэ нэмбэл зөвшөөрөхгүй” хэмээн мэдэгдээ.