Орон сууц захиалаад байрандаа орж чадаагүй 600 иргэн өргөдлийн байнгын хороонд ханджээ

Орон сууц захиалж, төлбөрөө төлсөн ч байрандаа орж чадаагүй тухай Өргөдлийн байнгын хороонд хандсан иргэдийн гомдлын тоо сүүлийн 3 сарын хугацаанд 600 даваад байна.  Энэ асуудлаар Улсын Их Хурлын гишүүд, холбогдох байгууллагууд болон төсөл хэрэгжүүлэгч компанийн төлөөллийг оролцуулан орон сууц захиалж хохирсон иргэдтэй уулзаж, санал хүсэлтийг нь сонслоо.

Уулзалтаар нэг орон сууцыг давхардуулан худалдах, барилгын ажил удаашрах, зогсох, мэдээллийн ил тод бус байдал зэрэг асуудалд тавих хяналт, зохицуулалтыг сайжруулах, дуусаагүй барилгуудыг гүйцээн ашиглалтад оруулахад төрийн бодит оролцоо, дэмжлэг үнэхээр шаардлагатай байгааг иргэд ахин дахин хэлж, учирлаж байна. 

Уулзалтад оролцсон иргэдийн дунд дахин төлөвлөлтийн хүрээнд газраа чөлөөлж өгсөн ч 12 жилийн турш байрандаа орж чадаагүй ахмад настан ирсэн байв. Тухайн иргэний асуудлыг яаралтай шийдвэрлэж, хэрэгжилтийн талаарх мэдээллийг Өргөдлийн байнгын хороонд ирүүлэхийг холбогдох төсөл хэрэгжүүлэгч компанид үүрэг болголоо.

Цаашид хохирсон иргэдийн асуудлыг шийдвэрлэх хүрээнд Өргөдлийн байнгын хорооны гишүүдээс ажлын хэсэг байгуулах, шаардлагатай тохиолдолд нээлттэй сонсгол зохион байгуулж, иргэдийг хохиролгүй болгох асуудлыг Улсын Их Хурлын түвшинд хэлэлцэн, холбогдох тогтоол, үүрэг чиглэл гаргах талаар анхаарч ажиллахаа илэрхийллээ.