"Алдарт эхчүүд"-ийг урамшуулахад тавьж буй зарим шаардлагыг хасна

УИХ-ын Хүний хөгжил, нийгмийн бодлогын байнгын хорооны хуралдаанаар “Олон хүүхэд төрүүлж өсгөсөн эхийг урамшуулах тухай” хуульд өөрчлөлт оруулах төслийн анхны хэлэлцүүлгийг хийлээ.

Тус төсөлд “бага хүүхэд нь нэг нас хүрсэн байх” гэсэн шалгуурыг хасахаар тусгасан бөгөөд энэ нь эх, хүүхдийг ялгаварлан гадуурхах эрсдэлийг бууруулж, хүүхэд бүрийн үнэ цэнийг ижил түвшинд хүлээн зөвшөөрөхөд чиглэж буйг ажлын хэсэг онцолсон байна.

Мөн үрчлэн авсан хүүхдэд тавигддаг “гурав хүртэлх насанд нь” гэх шаардлагыг ч хасах санал боловсруулжээ. Хуулийг 2027 оны нэгдүгээр сарын 1-нээс хэрэгжүүлэх санал гарсан байна.

Хэлэлцүүлгийн үеэр УИХ-ын гишүүн А.Ариунзаяа “Эхийн алдар” одон авсан ч хүүхдээ орхидог, үрчлүүлдэг асуудалд анхаарч, тодорхой бодлого хэрэгжүүлэх шаардлагатайг онцоллоо.

Эцэст нь ажлын хэсгийн боловсруулсан зарчмын зөрүүтэй саналуудыг байнгын хорооны гишүүдийн олонх дэмжжээ.