Г.Дамдинням: Зэсийг эдийн засгийн хоёр дахь тулгуур салбар болгоно

Засгийн газрын ээлжит хуралдаанаар "Ашигт малтмалын тухай хуульд нэмэлт, өөрчлөлт оруулах тухай" хуулийн төслийг хэлэлцэж, УИХ-д өргөн барихаар шийдвэрлэлээ.

Хэрэв уг хуулийн төсөл батлагдвал Цагаансуваргын ордыг шууд ашиглалтад оруулахаас гадна Хармагтайн орд зэрэг 10 гаруй бэлэн төсөл хөдөлж эхлэх боломж бүрдэхийг салбарын сайд Г.Дамдинням онцлов.

Тэрбээр, “Зэсийн салбараа идэвхжүүлснээр хүлээгдэж буй төслүүдийг урагшлуулж, улсын экспортын хүчин чадлыг 50 хүртэл хувиар нэмэгдүүлэх боломжтой. Үүний үр дүнд төсвийн орлого өсөж, иргэдэд хүрэх баялгийн сангийн өгөөж нэмэгдэнэ. Зэсийн салбар манай улсын эдийн засгийн хоёр дахь тулгуур салбар болно” гэв.

Хуулийн төсөлд тусгасан гол өөрчлөлтүүдийн нэг нь зэсийн ашигт малтмалын нөөц ашигласны төлбөр (АМНАТ)-ийг дэлхийн жишигт нийцүүлэн бууруулж, томоохон төслүүдийг урагшлуулах, гадаадын хөрөнгө оруулалтыг татах нөхцөлийг бүрдүүлэхэд чиглэж байна.

Мөн АМНАТ-ийн орлогын орон нутагт хуваарилах хувь хэмжээг одоогийн 10 хувиас 15 хувь болгон нэмэгдүүлэхээр тусгажээ. Үүнийг зөвхөн аймагт бус, хүн ам, газарзүйн байршил, лицензийн нөхцөл зэрэг шалгуурыг харгалзан суманд хүртэл хуваарилах зохицуулалтыг оруулсан байна.

Түүнчлэн дэлхийн зах зээлийн чиг хандлагад нийцүүлэн стратегийн ач холбогдол бүхий ашигт малтмалыг тодорхойлох, зарлах, мөн хайгуулын тусгай зөвшөөрлийг хөнгөвчилж, эрэл судалгааны ажлыг эрчимжүүлэх эрх зүйн орчныг бүрдүүлэх өөрчлөлтүүдийг хуулийн төсөлд тусгажээ.