Монгол, Японы хүнс хөдөө аж ахуйн салбарын хамтын ажиллагааны уулзалт Күмамото мужид боллоо

Монгол Улсаас Япон Улсад суугаа Онц бөгөөд Бүрэн эрхт Элчин сайд Б.Баярсайхан, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн нар 2026 оны 4 дүгээр сарын 22-ны өдөр Япон улсын Күмамото мужид албан томилолтоор ажиллалаа.

Томилолтын хүрээнд тус мужийн захирагч Такаши Кимүратай албан ёсны уулзалт хийж, Төрийн нарийн бичгийн дарга Т.Жамбалцэрэн Монголын мах, махан бүтээгдэхүүний экспортыг нэмэгдүүлэх, хүнс, хөдөө аж ахуйн салбарын хамтын ажиллагааг өргөжүүлэхэд Күмамото мужийг дэмжин ажиллахыг захирагч Такаши Кимүрагаас хүсэв.

Мөн Кюүшү дэх Монгол Улсын Өргөмжит консул Ё.Миишо, Күмамото-Монголын найрамдлын нийгэмлэгийн тэргүүн Араки нар хоёр орны хүнс, хөдөө аж ахуй, хөнгөн үйлдвэрийн салбарын хамтын ажиллагаанд бүх талаар дэмжлэг үзүүлэн ажиллахаа тэмдэглэн хэллээ.

Түүнчлэн Элчин сайд Б.Баярсайхан, Төрийн нарийн бичгийн дарга Т.Жамбалцэрэн нар Кюүшү дэх Монгол Улсын Өргөмжит консул Ё.Миишо, консулын газрын ахлах зөвлөх Т.Аоки, Күмамото-Монголын найрамдлын нийгэмлэгийн тэргүүн Араки нарын хамт Күмамото мужийн Хөдөө аж ахуйн хоршоо /JA/-ны Ерөнхийлөгч Т.Миямототой уулзалт хийв. Уулзалтаар Монгол адуу, хонины мах, махан бүтээгдэхүүнийг Японы хүнсний зах зээлд экспортлох, Монгол малын мах, махан бүтээгдэхүүний нэр төрлийг нэмэгдүүлэх чиглэлд Күмамото мужийн Хөдөө аж ахуйн хоршоотой хамтран ажиллах санал тавив.

Күмамото мужийн Хөдөө аж ахуйн хоршооны тэргүүн Т.Миямото Монгол адууны махыг Японы зах зээлд нэвтрүүлэх саналыг талархан хүлээн авч, холбогдох хууль тогтоомжийн дагуу импортлогдсон тохиолдолд борлуулалтын сүлжээгээр дамжуулан дэмжин ажиллахад бэлэн байгаагаа илэрхийлэв.