Шүүх: Т.Даваадалайг баривчлах саналыг үндэслэл дутуу гэж үзэж буцаалаа

Нийслэлийн Засаг даргын эдийн засаг, дэд бүтцийн асуудал хариуцсан нэгдүгээр орлогч Т.Даваадалайг 48 цагийн хугацаатай саатуулсан талаар бид өмнө нь мэдээлсэн. Улмаар түүнийг баривчилсан шийдвэрийг хүчинтэйд тооцуулах хүсэлтийг шүүхэд гаргасан ч уг хүсэлтийг хүлээн авахаас татгалзсан байна.

Тодруулбал, Нийслэлийн Прокурорын газрын хяналтын прокуророос мөрдөгчийн гаргасан “сэжигтнийг хойшлуулшгүйгээр баривчилсан” шийдвэрийг хүчинтэйд тооцуулах санал ирүүлснийг шүүх 04 дүгээр сарын 27-ны өдөр хянан хэлэлцжээ.

Прокурорын санал нь Эрүүгийн хэрэг хянан шийдвэрлэх тухай хуулийн 31.4 дүгээр зүйлийн 1 дэх хэсгийн 1.5, мөн 31.5 дугаар зүйлийн 1 дэх хэсгийн 1.3 болон 3 дахь хэсэгт заасан үндэслэлүүдэд тулгуурласан байв. Гэвч шүүх хэрэгт авагдсан баримтуудтай танилцахад дараах зөрчлүүд илэрсэн байна. Үүнд:

- Сэжигтнийг баривчилсан шийдвэрийг хүчинтэйд тооцуулах болон шүүхийн зөвшөөрлөөр баривчлуулах       гэсэн хоёр өөр агуулгатай үндэслэлийг хольж дурдсан,
- Баривчилсан хугацааг зөрүүтэй тэмдэглэсэн,
- Эрүүгийн хэрэг хянан шийдвэрлэх тухай хуулийн 31.5 дугаар зүйлийн 2 дахь хэсэгт заасан аль үндэслэлээр баривчилсан нь тодорхойгүй байсан. Иймд прокурорын саналыг хүлээн авах үндэслэлгүй гэж шүүх үзэж, хүсэлтийг буцаасан байна.