С.Бямбацогт: Ард түмний хүсэж буй шударга ёсыг тогтооход хууль тогтоох, шүүх эрх мэдлийн хамтын ажиллагаа чухал

Монгол Улсын Их Хурлын дарга С.Бямбацогт өнөөдөр (2026.04.22) Шүүхийн ерөнхий зөвлөлийн бүрэлдэхүүнтэй уулзаж, тус зөвлөлийн үйл ажиллагаа, хууль эрх зүйн орчин, тулгамдаж буй асуудлуудын талаар мэдээлэл сонсож, санал солилцлоо. 

Уулзалтын үеэр тэрбээр 2019 оны Үндсэн хуулийн нэмэлт, өөрчлөлтөөр шүүхийн хараат бус байдлыг бэхжүүлсэн болон 2022 онд Шүүхийн багц хуулиудыг баталсан туршлагаа онцолж, хууль тогтоох болон шүүх эрх мэдлийн байгууллагуудын хамтын ажиллагаа чухал болохыг тэмдэглэв. 

Мөн Шүүхийн тухай хууль хэрэгжээд таван жил болж буйтай холбогдуулан үр дагаврын үнэлгээ хийж, шаардлагатай нэмэлт, өөрчлөлтийн саналыг УИХ-д ирүүлэхийг онцоллоо.

Пүрэвдоржийн Золзаяа зөвлөлийн үйл ажиллагаа, шинэтгэлийн үр дүн, тулгамдсан асуудлыг танилцуулж, хэрэг хуваарилалтыг нөлөөнөөс ангид шийдвэрлэх, шүүх хурлыг нээлттэй болгох зэрэг ахиц гарсныг дурдав.

Харин шүүхийн байр, дэд бүтэц, хүний нөөц, цахим системийн хөгжүүлэлт зэрэгт анхаарах шаардлага байгааг онцолсон бөгөөд зарим шүүх байргүй, түрээсийн нөхцөлд ажиллаж буйг мэдээллээ.

Уулзалтын төгсгөлд УИХ-ын дарга шүүхийн хараат бус байдал, хариуцлагын тэнцвэрийг хангах хүрээнд шаардлагатай эрх зүйн дэмжлэгийг үргэлжлүүлэн үзүүлэхээ илэрхийллээ.