У.Хүрэлсүх: Казакстан улсын консулын газрыг Монголд байгуулах саналыг дэмжиж байна

Монгол Улсын Ерөнхийлөгч Ухнаагийн Хүрэлсүхийг Бүгд Найрамдах Казахстан Улсын Ерөнхийлөгч Касым-Жомарт Кемелевич Токаев албан ёсоор угтах ёслол боллоо. Үргэлжлүүлэн хоёр улсын төрийн тэргүүний ганцаарчилсан уулзалт, албан ёсны хэлэлцээ үргэлжилж байна.

Ерөнхийлөгч У.Хүрэлсүхэд Казахстаны Парламентын дарга, Ерөнхий сайд нар бараалхаж, харилцаа, хамтын ажиллагааны чиглэлээр санал солилцох юм. Айлчлалын хүрээнд талууд хоёр улсын эрх зүйн үндсийг бэхжүүлэхэд чухал хувь нэмэр оруулах Засгийн газар болон байгууллага хоорондын баримт бичгүүдэд гарын үсэг зурахаар төлөвлөөд буй.

Уулзалтын үеэр Монгол Улсын Ерөнхийлөгч, хоёр улсын хамтын ажиллагаа шинэ шатанд гарсанд талархаж буйгаа илэрхийлээд талуудын эдийн засгийн хамтын ажиллагааг өргөжүүлэх чиглэлд анхаарч буйгаа хэллээ. Мөн ноос ноолуур, мал аж ахуйд тулгуурлан хөдөө аж ахуйн салбарт хамтран ажиллах бүрэн боломжтой гэлээ. Эдийн засгийн хамтын ажиллагааг өргөжүүлэхэд тээвэр ложестикийн асуудал чухал болохыг онцлоод энэ хүрээнд хамтарсан ажлын хэсэг байгуулах асуудлыг дурдсан юм.   

Мөн Бүгд Найрамдах Казактсан улсын талаас Монгол улсад консулын газрыг байгуулах санал тавьсан. Уг саналыг дэмжиж буй гэдгээ илэрхийллээ. 

Айлчлалын хүрээнд талууд худалдаа, эдийн засаг, банк, газрын тос, эрчим хүч, хот байгуулалт, шинжлэх ухаан, соёл, залуучууд, спорт, аялал жуулчлал, хэвлэл мэдээлэл, музей зэрэг салбарт хамтран ажиллах тухай Засгийн газар болон байгууллага хоорондын баримт бичигт гарын үсэг зурах үйл ажиллагаа болж байна.