Манай улсын нийт сурагчдын 79% нь үе тэнгийн дээрэлхэлт байдаг гэж хариулжээ

Үе тэнгийн дээрэлхэлтийн асуудлаар Боловсролын сайд холбогдох байгууллагуудын төлөөлөлтэй уулзалт хийлээ. 2025-2026 оны хичээлийн жилд нийт 1.28 сая гаруй суралцагч буюу Монгол Улсын хүн амын 1/3 нь суралцаж байна. Эдгээр сурагчдын 79% нь дээрэлхэлт байдаг гэж хариулжээ. 

Дээрэлхэлтэд өртсөн хүүхдүүдэд дараах сөрөг нөлөө илэрдэг байна. Үүнд:

• Сэтгэл түгших, сэтгэл гутрал, ганцаардал
• Өөртөө итгэх итгэл буурах
• Хүмүүст итгэх итгэл алдагдах (насанд хүрсэн хойно ч үргэлжлэх эрсдэлтэй)
• Удаан хугацааны стресс

Үүн дээр урьдчилан сэргийлэх нэгдсэн систем байхгүй, сургуулиуд өөр өөрсдийн хэмжээнд ажиллах, хүүхдийн дуу хоолой хангалтгүй, дата мэдээлэл зөрүүтэй, цахим дээрэлхэлтэд тусгай шийдэлгүй байгаад байна.

Дээрэлхэгч, дээрэлхүүлэгч хүүхдүүд дээр анхаарлаа хандуулдаг ч хөндлөнгийн ажиглагч, мэддэг, мэдсэн мөртлөө мэдээгүй мэт царайлдаг хүүхэд томчуудийн хувьд хамгаалах гэдэг мэдлэг мэдээлэл байхгүй, дуу хоолойгоо өргөхгүй байгаад анхаарлаа хандуулах хэрэгтэй байна. 

Иймд дараах арга хэмжээг үе шаттай хэрэгжүүлэх шаардлагатай гэж үзэж байна. Үүнд:

1. Үе тэнгийн дээрэлхэлтийн эсрэг нэгдсэн хууль, эрх зүйн орчин бүрдүүлэх
2. Сургуулиудад хэрэгжүүлэх бодлогын загвар, сургалтын хөтөлбөр бий болгох
3. Илрүүлэлт, мэдээллийн нэгдсэн систем нэвтрүүлэх
4. Тодорхой, шаталсан хариу арга хэмжээг хэрэгжүүлэх

Мөн дээрэлхэлттэй тэмцэх 5 тулгуурт тогтолцоо шаардлагатайг онцолж байна. Үүнд:

• Сургуулийн соёл – Эерэг, аюулгүй орчныг бүрдүүлэх
• Урьдчилан сэргийлэлт – Сурагчдад чиглэсэн боловсрол, хөтөлбөр
• Кейс удирдлага – Тухайн тохиолдолд авах хариу арга хэмжээ
• Хууль эрх зүй – Ялангуяа цахим орчны хамгаалалт
• Хяналт, үнэлгээ – Илрүүлэлт, бүртгэл, тайлагналын цахим систем

Эдгээрийг цогцоор нь хэрэгжүүлснээр хүүхэд бүр аюулгүй, дээрэлхэлтгүй орчинд суралцах нөхцөл бүрдэх боломжтой юм.