МҮОХ “Хүннү эйр”-тэй олимпын түншлэлийн гэрээ байгууллаа

Монголын Үндэсний Олимпийн Хороо (МҮОХ) болон Хүннү Эйр ХХК олимпын түншлэлийн гэрээ байгуулах ёслол Олимпик хауст боллоо.

Тус гэрээ нь Олон улсын олимпийн хороо (ОУОХ)-ны бодлого, Азийн олимпын зөвлөлийн хүрээнд 2026–2027 онд зохион байгуулагдах олон улсын наадмуудыг угтан хэрэгжихээр болж байна.

Гэрээнд МҮОХ-ны Тэргүүн дэд ерөнхийлөгч Ч.Наранбаатар, “Хүннү эйр” ХХК-ийн захирал П.Мөнхжаргал нар гарын үсэг зурсан бол ёслолд МҮОХ-ны ерөнхийлөгч Б.Баттүшиг болон Гүйцэтгэх зөвлөлийн гишүүд оролцлоо.

Энэхүү “Olympic Partner” гэрээ 2027 оныг дуустал хүчинтэй үргэлжлэх бөгөөд энэ хугацаанд “Хүннү эйр” ХХК:

• Тивийн болон олон улсын наадамд оролцох Монголын баг тамирчдын тээврийг дэмжих
• Чартер нислэг зохион байгуулах
• Хөгжөөн дэмжигчид, жуулчдын аяллыг зохион байгуулах чиглэлээр хамтран ажиллах юм.

Ингэснээр Монголын тамирчдын гадаад тэмцээн, наадамд оролцох нөхцөл боломж сайжирч, спортын аялал жуулчлалд ч бодит дэмжлэг үзүүлэх ач холбогдолтой гэж үзэж байна.