ИЗНН ардчиллыг хамгаалах зорилгоор УИХ-ын гишүүнийг эгүүлэн татах хуулийн төслийг дэмжихгүй

Өнөөдөр буюу 2026.04.15-нд  Иргэний Зориг Ногоон нам Улсын Их Хурлын тухай хуульд нэмэлт, өөрчлөлт оруулах тухай хуулийн төсөл буюу Улсын Их Хурлын гишүүнийг эгүүлэн татах хуулийн төслийн талаар байр сууриа илэрхийлж, хуулийн төслийг дэмжихгүй гэдгээ мэдэгдлээ.

УИХ-ын гишүүн М.Нарантуяа-Нара хэлэхдээ:

“Ёс зүйн дэгийн дэд хорооны дарга Боловсролын зээлийн сангаас 250 сая төгрөгийн зээл авч суралцчихаад одоо хүртэл төлөөгүй, улсаа хохироогоод явж байна. Ийм асуудалтай хүн Ёс зүйн дэгийн дэд хорооны даргын албыг хашчихаад бусад гишүүдийн ёс зүйг шүүх нь хэр зохимжтой вэ. Ардчилал бол манай улсын том ололт. Тийм утгаар парламентын ардчилалтай байх ёстой. Ингэж байж ард түмний дуу хоолой болсон гишүүд ажлаа бүрэн хэрэгжүүлэх боломжтой юм. Тийм учраас ИЗНН ардчиллыг хамгаалах зорилгоор энэ хуулийн төслийг дэмжихгүй гэдгээ илэрхийлж байна.” гэв.

Нөгөөтэйгүүр, ИЗНН-ын хоёр гишүүн УИХ-ын гишүүнийг эгүүлэн татах хуулийн санаачилчихаад Ерөнхийлөгчийн өргөн барьсан хуулийг яагаад эсэргүүцэж байгаа вэ гэдэг асуудал иргэдийн дунд төрж болно.

“Сонгосон гишүүнээ эргээд буулгах эрх ард түмэнд л байх ёстой болохоос хэн нэгэн дарга, эрх мэдэлтэнд байх ёсгүй. Ард түмний сонголтод нөлөөлөх боломжийг олгож болохгүй. Энэ нь ардчиллыг үгүйсгэж байгаа нэг хэлбэр болно” гэж үзэж байна.

Ярилцлагыг эндээс үзнэ үү.