Эдийн засгийн байнгын хорооны хуралдаанаар гурван асуудлыг хэлэлцэн шийдвэрлэв

Эдийн засгийн байнгын хороо гурван асуудал хэлэлцэн шийдвэрлэлээ

Улсын Их Хурлын Эдийн засгийн байнгын хорооны хуралдаан 2026 оны дөрөвдүгээр сарын 15-ны өдөр Төрийн ордны “Их засаг” танхимд болж, гурван асуудлыг хэлэлцэн шийдвэрлэлээ.

Хуралдаанд байнгын хорооны 31 гишүүнээс 17 нь оролцож, 51.6 хувийн ирцтэйгээр эхэлсэн байна. Хуралдааныг Улсын Их Хурлын гишүүн Р.Сэддорж даргалж, ирц болон хэлэлцэх асуудлын товыг танилцууллаа.

Үндсэн хуулийн цэцийн дүгнэлтийг хүлээн зөвшөөрөв

Хуралдаанаар Монгол Улсын Үндсэн хуулийн цэцийн 2026 оны 02 дугаар дүгнэлтийг хэлэлцэв. Уг дүгнэлт нь Мэргэжлийн нэгдсэн холбооны эрх зүйн байдлын тухай хуулийн зарим зохицуулалт Үндсэн хууль зөрчсөн эсэх асуудалтай холбоотой юм.

Илтгэлийг Улсын Их Хурлын гишүүн О.Батнайрамдал танилцуулж, мэргэжлийн нэгдсэн холбоог Улсын дээд шүүхэд бүртгүүлэхээр заасан нь шүүх эрх мэдлийн үндсэн чиг үүрэгт нийцэхгүй, эрх мэдэл хуваарилах зарчмыг зөрчсөн гэж Үндсэн хуулийн цэц үзсэн талаар мэдээлжээ.

Хэлэлцүүлгийн үеэр гишүүд мэргэжлийн холбоодын үйл ажиллагаанд тавих шаардлагыг сайжруулах, төрийн бус байгууллагын эрх зүйн орчныг боловсронгуй болгох шаардлагатайг онцолсон байна.

Ингээд санал хураахад хуралдаанд оролцсон гишүүдийн 52.9 хувь нь Үндсэн хуулийн цэцийн дүгнэлтийг хүлээн зөвшөөрөхийг дэмжив. Тус асуудлаар чуулганы нэгдсэн хуралдаанд танилцуулах илтгэгчээр Улсын Их Хурлын гишүүн М.Энхцэцэгийг томиллоо.

Санхүүгийн хоршооны тухай хуулийн төсөлд ажлын хэсэг байгууллаа

Мөн хуралдаанаар Санхүүгийн хоршооны тухай хуулийн шинэчилсэн найруулгын төслийг хэлэлцүүлэгт бэлтгэх ажлын хэсэг байгуулах тухай асуудлыг хэлэлцэв.

Улсын Их Хурлын гишүүн Л.Соронзонболд ахлагчтай, 10 гишүүний бүрэлдэхүүнтэй ажлын хэсэг байгуулах тогтоолын төслийг гишүүдийн 64.7 хувь нь дэмжсэнээр баталлаа.

Хууль, тогтоолын хэрэгжилт дунджаар 77.3 хувьтай байна

Хуралдааны төгсгөлд “Хууль, тогтоолоор үүрэг чиглэл болгосон Улсын Их Хурлын шийдвэрийн биелэлтийн тайлан”-г сонсов. Тайланг Монгол Улсын сайд, Засгийн газрын Хэрэг эрхлэх газрын дарга Б.Энхбаяр танилцуулсан юм.

Танилцуулгад дурдсанаар, 2025 оны жилийн эцсийн байдлаар Улсын Их Хурлын шийдвэрийн хэрэгжилт дунджаар 77.3 хувьтай байна. Харин яам, агентлаг, аймаг, нийслэлийн хэрэгжүүлж буй 386 шийдвэрийн 1978 заалтын хэрэгжилт 85.3 хувьтай гарчээ.

Гэсэн хэдий ч хэрэгжээгүй 160 заалтын дийлэнх нь удирдлага, зохион байгуулалтын асуудлаас шалтгаалсан бол үлдсэн хэсэг нь санхүү, хөрөнгө оруулалтын хүндрэлтэй холбоотой байна.

Гишүүд тайлангийн чанар, хариуцлагыг шүүмжиллээ

Хэлэлцүүлгийн үеэр гишүүд хууль, тогтоолын хэрэгжилтийн тайланг хэлэлцэж байхад Засгийн газрын танхимын гишүүд оролцоогүйд шүүмжлэлтэй хандсан байна.

Түүнчлэн хууль тогтоомжийн хэрэгжилтийг бодитоор үнэлэх, тайлагналтын чанар, хариуцлагыг сайжруулах шаардлагатайг онцолжээ.

Эдийн засгийн байнгын хорооны дарга Р.Сэддорж тус байнгын хорооны эрхлэх асуудлын хүрээн дэх шийдвэрийн хэрэгжилт 54.5 хувьтай байгаа нь хангалтгүй үзүүлэлт хэмээн дүгнэж, цаашид хэрэгжилтийг эрчимжүүлэх шаардлагатайг онцолсон байна.