АТГ: Нийтийн албан тушаалтанд хахууль санал болгосон иргэнийг шүүхээс торгох ялаар шийтгэв

2025 оны арваннэгдүгээр сард иргэн Д нь эмийн сангийн чиглэлээр үйл ажиллагаа явуулдаг “А” компанийн эмийн сангийн байршлыг холбогдох шинжээчийн дүгнэлтгүйгээр шилжүүлэх зорилгоор Нийслэлийн Эрүүл мэндийн газрын ахлах мэргэжилтэнд хахууль санал болгосон хэрэг гарчээ.

Тодруулбал, тэрээр албан тушаалтанд кофе уух санал тавихдаа хоосон аяганд нэг сая төгрөг бэлнээр хийж, таглан өрөөнд нь үлдээсэн байна. Харин уг албан тушаалтан нь нийтийн албан тушаалтны хувиар хуулиар хүлээсэн үүргээ биелүүлж, уг үйлдлийг байгууллагынхаа эрх бүхий албан тушаалтнаар дамжуулан Авлигатай тэмцэх газарт мэдэгдсэн байна.

Улмаар Авлигатай тэмцэх газрын мөрдөн шалгах хэлтэс эрүүгийн хэрэг үүсгэн шалгаж, шүүхэд шилжүүлэх саналтайгаар прокурорт хүргүүлжээ.

Хэргийг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх 2026 оны нэгдүгээр сарын 23-ны өдөр хэлэлцэж, иргэн Д-ийг Эрүүгийн хуулийн 22.5 дугаар зүйлийн 1 дэх хэсэгт заасан “хахууль өгөх” гэмт хэргийг үйлдсэн гэм буруутайд тооцсон байна.

Шүүхээс түүнд нийтийн албанд томилогдох эрхийг хоёр жилийн хугацаагаар хасаж, гурван сая төгрөгөөр торгох ял оногдуулжээ.

Шүүхийн шийдвэрт дурдсанаар, шүүгдэгч Д нь өөрийн үйлдлийн хууль бус шинжийг ухамсарлаж, санаатайгаар үйлдсэн нь гэрчүүдийн мэдүүлэг болон өөрийнх нь хэргээ хүлээн зөвшөөрсөн мэдүүлгээр хангалттай нотлогдсон байна. Мөн мөрдөн шалгах ажиллагаа хуульд нийцсэн, оролцогчдын эрхийг зөрчсөн ноцтой зөрчил илрээгүй гэж дүгнэжээ.