ХААИС-д 135 морины хүчин чадалтай “Кубота” тракторыг Япон улсын “Нийгата Кубота” ХХК-иас хандивлалаа

Сүүлийн жилүүдэд Монгол Улсад хөдөө аж ахуйн салбар эрчимтэй хөгжиж, техник, технологийн шинэчлэл эрчимжиж байгаа нь мэргэжлийн боловсон хүчний хэрэгцээг улам нэмэгдүүлж буй юм. Энэ хүрээнд ХААИС нь сургалт, судалгааны орчноо сайжруулж, оюутнуудыг орчин үеийн техник технологид суралцах боломжийг бүрдүүлэхэд онцгой анхаарч ажиллаж байна.

Олон улсын хамтын ажиллагааны хүрээнд Япон улсын “Нийгата Кубота” ХХК-тай тогтоосон түншлэл амжилттай үргэлжилж байна. Тус компани 13 жилийн өмнө сургалтын зориулалтаар хоёр трактор хандивлаж байсан юм.

Харин энэ удаад 135 морины хүчин чадалтай “Кубота” тракторыг оюутнуудын сургалт, судалгаанд ашиглуулахаар хандивлалаа. 

Энэхүү техник нь оюутнуудад орчин үеийн хөдөө аж ахуйн машин, механизмтай ажиллах мэдлэг, ур чадварыг эзэмшүүлэхэд чухал ач холбогдолтой юм.

Мөн талууд Монгол Улсад газар тариалангийн үйлдвэрлэлд жолоочгүй трактор нэвтрүүлэх боломжийг судлах чиглэлээр хамтын ажиллагааны санамж бичигт гарын үсэг зурсан байна. Энэ нь хөдөө аж ахуйн салбарт дэвшилтэт технологийг нэвтрүүлэх, үйлдвэрлэлийн бүтээмжийг нэмэгдүүлэхэд чухал алхам болж байгааг онцоллоо. 

Ярилцлагынг эндээс үзнэ үү.