Хүүхэд хамгааллын компакт гэрээний Тав дахь удаагийн хоёр талт хэлэлцүүлэг боллоо

АНУ болон Монгол Улсын төрийн байгууллагын албан тушаалтнууд, иргэний нийгмийн байгууллагын төлөөлөгчид “Хүүхэд хамгааллын компакт гэрээ”-ний (ХХКГ) хүрээнд жил бүр зохион байгуулдаг хоёр талт хэлэлцүүлэгт тав дахь удаагаа оролцож, өнгөрсөн таван жилийн хугацаанд хэрэгжүүлсэн ажлын ололт амжилт, тулгамдсан сорилтыг онцлон хэлэлцжээ.

АНУ-аас ХХКГ-ний хэрэгжилтэнд зориулан 6.5 сая ам.долларын гадаад тусламжийг “Дэлхийн Зөн Монгол”, “Азийн сан” болон бусад дотоодын түнш байгууллагуудад олгож, Монгол Улсын хүн худалдаалах гэмт хэрэгтэй тэмцэх чадавхыг бэхжүүлэхэд дэмжлэг үзүүлсэн байна.

 Ерөнхийлөгч Трамп хүн худалдаалах гэмт хэргийн хор уршигтай тэмцэх АНУ-ын бодлогыг ахин шинэчилж байна. Үүнд, албадан хөдөлмөр ашигладаг залилангийн сүлжээнүүдэд хориг арга хэмжээ авах чиглэлд гаргасан засгийн газрын ололтыг онцолж, хүний наймаатай тэмцэх үндэсний шуурхай утасны санхүүжилтийг нэмэх, мөн энэ төрлийн гэмт хэрэгтэй тэмцэх, хохирогчдод амьдралаа дахин босгоход нь дэмжлэг үзүүлэх чиглэлд орчин үеийн шинэ арга барил ашиглах бодлогыг тууштай баримтлах болно. “Америк нэгдүгээрт” зарчимд суурилсан гадаад тусламжийн бодлогын энэхүү шинэ эринд бид АНУ-ын гадаад тусламжийг засгийн газрын тэргүүлэх чиглэлүүдтэй шууд уялдуулж, Америкийн ард иргэдэд бодит үр өгөөж өгөх, Америкийг илүү аюулгүй, хүчтэй, чинээлэг болгоход анхаарч байна.

 Тус хэлэлцүүлгийн үеэр АНУ-ын ЭСЯ-ны Хэргийг түр хамаарагч Нийл Вермиллион хэлсэн үгэндээ, “Өнөөдрийн хэлэлцүүлэг нь зөвхөн бидний хамтдаа хүрсэн ахиц дэвшлийг тэмдэглэх бус, харин энэ ололтоо урт удаан хугацаанд хадгалах бодит амлалтыг өгөх боломж юм. Хэрэв бид тэгж чадвал 6.5 сая ам.долларын санхүүжилт бүхий энэхүү компакт хөтөлбөрийн бодит үр дүн хүүхдүүд илүү аюулгүй, гэр бүлүүд илүү бат бэх болж, мөн “Монгол Улсад хүүхдийн эрх ашиг нэн тэргүүнд тавигдана, нэг ч хүүхэд мөлжлөгийн хохирогч болох ёсгүй” гэсэн энгийн зарчмыг хэлбэрэлтгүй хэрэгжүүлдэг шударга ёсны тогтолцоо бий болсноор хэмжигдэх болно” хэмээн онцлов.

 Энэхүү хөтөлбөр нь манай улсын Ази тив дэх стратегийн нэгэн чухал түнш улстай хамтран хууль дээдлэх ёсыг бэхжүүлж, гэмгүй хүүхдүүдийг хамгаалахад чиглэж байна. Тус ХХКГ-ийн хүрээнд Монгол Улс хүн худалдаалах гэмт хэргийг илрүүлэх, холбон зуучлах, мэдээлэх, хохирогчдод үйлчилгээ үзүүлэхтэй холбоотой ажиллагаанд мөрдөх журам, стандартыг боловсруулан баталж; хүүхдэд ээлтэй найман өрөөг тохижуулж, хүн худалдаалах гэмт хэрэгтэй тэмцэх эрх зүйн орчныг сайжруулж, мөн бэлгийн хүчирхийлэл, мөлжлөгийн хохирогч хүүхдүүдэд зориулсан үндэсний хэмжээний анхны нөхөн сэргээх төвийг тус тус байгуулсан байна. Эдгээр арга хэмжээ нь хохирогчдыг хамгаалахын зэрэгцээ голдуу хил дамнасан гэмт бүлэглэлийн сүлжээнүүдтэй холбогдон үйлдэгддэг хүн худалдаалах гэмт хэргийг таслан зогсооход хууль сахиулах байгууллагуудын хамтын ажиллагааг нэмэгдүүлэхэд мөн хувь нэмэр оруулж байна.

Хэлэлцүүлэгт АНУ-ын ЭСЯ-ны Хэргийг түр хамаарагч Нийл Вермиллион, Төрийн департаментын Хүн худалдаалахтай тэмцэх, хяналт тавих албаны ахлах зохицуулагч Марк Форстром, мөн Монгол Улсын Ерөнхий прокурорын орлогч М.Чинбат, Гэр бүл, хөдөлмөр, нийгмийн хамгааллын дэд сайд Б.Солонгоо, Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Ж.Буянбат нар оролцож үг хэлэв.