Булган аймагт энэ оны эхний гурван сарын байдлаар 706 удаагийн газар хөдлөлт бүртгэгдлээ

Монгол Улсын Засгийн газрын 2017 оны 67 дугаар тогтоолоор жил бүрийн гуравдугаар сарын дөрөв дэх долоо хоногийн лхагва гаргийг “Газар хөдлөлтийн аюулаас урьдчилан сэргийлэх, таниулах өдөр” болгосонтой холбогдуулан өнөөдөр улс орон даяар энэ өдрийг ес дэх жилдээ тэмдэглэж байна.

Булган аймагт гуравдугаар сарын 26-ны өдрийн 16:00 цагт гамшгийн зарлан мэдээллийн дуут дохио дуугаран ажиллахаар бэлтгэл хангаад байна.

Газар хөдлөлтийн аюулаас урьдчилан сэргийлэх эрсдэлийг бууруулах, бэлэн байдлыг хангах, аврах үйл ажиллагаа, газар хөдлөлтийн гамшигтай тэмцэх байнгын бэлэн байдлыг дээшлүүлэх мэдлэг, мэдээллээ дээшлүүлж, болзошгүй эрсдэлээс хамгаалах анхан шатны сургалт, дадлагад хамрагдахыг Онцгой байдлын газраас уриаллаа. 

Ташрамд, Булган аймагт оны эхний гурван сарын байдлаар 706 удаагийн газар хөдлөлтийн чичирхийлэл бүртгэгдсэн байна. Эдгээрээс хамгийн хүчтэй нь хоёрдугаар сарын 1-ний өдөр Могод сумын төвөөс урд зүгт 31 км-т 3.5 магнитудын хүчтэй газар хөдөлжээ.