Төв талбайд “Монгол Наурыз-2026” үйл ажиллагаа үргэлжилж байна

Казах түмний уламжлалт Наурызын баярыг тохиолдуулан “Монгол Наурыз-2026” үйл ажиллагаа Улаанбаатар хотын Д.Сүхбаатарын талбайд өргөн дэлгэр болж байна.

Наурызын баярын үйл ажиллагаанд УИХ-ын дарга, МАН-ын дарга Н.Учрал, Ерөнхий сайд Г.Занданшатар болон нийслэлийн удирдлагууд, иргэд олон нийт өргөнөөр оролцож байна.

"Энэхүү үйл ажиллагаа нь казах түмний эртнээс уламжлагдан ирсэн баяр ёслол, соёл урлаг, ахуй амьдралын өвөрмөц онцлогийг олон нийтэд таниулан сурталчлахад чиглэж байна. Манай Нутгийн зөвлөлийн санаачилгаар зохион байгуулж буй уг үйл ажиллагааг нийслэлийн Засаг даргын Тамгын газар болон Нийслэлийн Аялал жуулчлалын газар дэмжин хамтран хэрэгжүүлж байна.

Баярын хүрээнд соёл, урлагийн тоглолт, “Казах күрес” буюу казах үндэсний бөхийн барилдаан, гар урлалын үзэсгэлэн, казах гэр, үндэсний хэв маяг шингэсэн гар урлал, уран бүтээлийн танилцуулга зэрэг олон ажлыг зохион байгуулж байна. Мөн Наурызын баярын ширээ засаж, көже шөл болон уламжлалт идээ зоогийг зочдод амсуулахын зэрэгцээ үндэсний хувцастай шилдэг гэр бүлийг шалгаруулна.

Тус үйл ажиллагаа жилээс жилд цар хүрээгээ тэлж, оролцогчдын тоо нэмэгдэн, өмнөх жилүүдээс илүү өргөн хүрээнд тэмдэглэж байна" хэмээн Улаанбаатар хот дахь Баян-Өлгий аймгийн Нутгийн зөвлөлийн дарга Абиланы Айдос онцоллоо. 

ЮНЕСКО-гийн Хүн төрөлхтний соёлын биет бус өвийн жагсаалтад бүртгэгдсэн Наурызын баяр нь үндэсний өв соёл, зан заншлыг сурталчлан таниулах, олон үндэстний эв нэгдлийг бэхжүүлэхэд чухал ач холбогдолтой юм.