Төрийн тэргүүний санаачилсан үндэсний хөдөлгөөнийг амжилттай хэрэгжүүлж байгаад талархал илэрхийллээ

Монгол Улсын Ерөнхийлөгч У.Хүрэлсүх Баян-Өлгий аймагт очиход аймгийн удирдлагууд, Өлгий цэргийн хүрээний хүндэт харуул угтаж авлаа.

Ерөнхийлөгч Наурызын баярт зориулсан баярын хуралд оролцон, казах түмэнд Хаврын баярын мэнд өргөн дэвшүүлж, эрүүл энх, сайн сайхан бүхнийг хүсэн ерөөв.

Тэрбээр бодлого, үйл ажиллагааныхаа хэрэгжилт, санаачилсан хөтөлбөр, хууль, түүний дотор УИХ-ын гишүүнийг эгүүлэн татахтай холбоотой хуулийн төсөл, улс орны нийгэм, эдийн засгийн байдлын талаар танилцуулж, “Хүнсний хувьсгал”, “Тэрбум мод”, “Эрүүл монгол хүн” хөдөлгөөн, “Цагаан алт”, “Илгээлт-2100” хөтөлбөр амжилттай хэрэгжиж байгааг хэллээ. Үүнд Баян-Өлгий аймгийн удирдлага, төр, хувийн хэвшил, нийгмийн байгууллагын хамтын ажиллагаа, ард иргэдийн хүчин чармайлт, хичээл зүтгэл ихээхэн хувь нэмэр оруулж байгаад талархал илэрхийлсэн юм.

Баян-Өлгийнхөн өвлийг өнтэй давж, ололт амжилтаа улам бататгах итгэл, өөдрөг сэтгэлээр хаврын баяртайгаа золгож байгааг аймгийн Засаг дарга Ё.Зангар хэлж, Ерөнхийлөгчийн санаачилсан хөтөлбөрүүд, аймагт өрнөж буй бүтээн байгуулалтыг товч танилцуулахдаа, -“Хүнсний хувьсгал” хөдөлгөөний дүнд 83 аж ахуйн нэгж 12 тэрбум төгрөгийн зээл авч эрчимжсэн мал аж ахуй, мал төхөөрөх, мах боловсруулах, сүү, цагаан идээ, гурилан бүтээгдэхүүн үйлдвэрлэж байна. Баян-Өлгий аймаг төмс, хүнсний ногооны хэрэгцээгээ өөрсдөө хангаж, илүү гарсныг хөрш улс руу гаргадаг байсан үе бий. Нэг хэсэг импортын ногоо хэрэглэж байсан бол “Хүнсний хувьсгал”, “Атрын IV аян”-ы дүнд газар тариалан эргэн сэргэсэн. Ирэх намар хэрэгцээт төмсний 70, хүнсний ногооны 25 хувийг өөрсдөө хангахыг зорьж байна. “Ерөнхийлөгчийн илгээлт 2100” тэтгэлэгт хөтөлбөрөөр аймгийн 20 гаруй хүүхэд ОХУ, БНХАУ, БНТУ, АНУ, Унгар, Чех, Польш, Казахстан улсад сурч байна” гэлээ.

Төрийн тэргүүний бодлого, үйл ажиллагаа, санаачилсан хөтөлбөр, хуулийн төсөл, түүний дотор нийгмийн анхаарлын төвд байгаа УИХ-ын гишүүнийг эгүүлэн татахтай холбоотой төслийг иргэд дэмжиж байгаагаа илэрхийлжээ. Мөн Өлгий хотын агаарын бохирдол ихсэж байгааг шүүмжилж, тарьсан модоо арчилж тордоход ахмадуудын хүчийг ашиглах, айл өрхийг сэргээгдэх эрчим хүчээр хангах чиглэлээр дорвитой ажил хийх шаардлагатайг ч хэлж байлаа.

Баян-Өлгий аймаг өнгөрсөн онд хаягдал ус цэвэрлэх байгууламж, төмөр бетон гүүр, авто зам, Алтай Таван Богдын БЦГ, Булган, Алтанцөгц, Бугат сумын цахилгаан хангамжийн байгууламж, аймгийн 100 ортой нэгдсэн эмнэлэг, Улаанхус сумын 150 ортой, Өлгий сумын 120 ортой эмнэлэг, Ногооннуур, Булган сумын 50 ортой шинэ цэцэрлэг, Дэлүүн, Бугат сумын хатуу хучилттай авто зам зэргийг ашиглалтад оруулжээ. Аялал жуулчлал, спортын цогцолбор, төрийн албан хаагчдын орон сууц, Өлгий, Алтанцөгц, Алтай суманд тус бүр 100 ортой цэцэрлэгийн барилгыг энэ онд эхлүүлэх ажээ.

Баян-Өлгий аймгийн хөдөлмөрч ард иргэд бүс нутаг төдийгүй улс орны хөгжилд үнэтэй хувь нэмэр оруулсаар ирсэн бөгөөд төрийн тэргүүний санаачилсан үндэсний хөдөлгөөнүүдийг амжилттай хэрэгжүүлэхэд идэвхтэй оролцож байгаад Ерөнхийлөгч талархал илэрхийллээ. Тэрбээр аймаг, орон нутгийн удирдлага, иргэдэд амжилт хүсэн, ололт, амжилтаа бататгаж, эвийг эрхэмлэж, зөвийг тэтгэн, улс Монголоо хөгжүүлэхийн төлөө хичээн зүтгэхийг уриалжээ.