Хүнсний хувьсгал хөдөлгөөний хүрээнд гол нэрийн хүнсний бүтээгдэхүүний дотоодын хангалтыг нэмж байна

Энэ хүрээнд ерөнхий боловсролын сургуулийн сурагчид болон байнгын асаргаа шаардлагатай зорилтот бүлгийн хүүхдүүдийн кальци, Д аминдэмийн дутагдлыг бууруулах, дархлааг дэмжих, өсөлт хөгжил, суралцах чадварыг сайжруулах зорилгоор “Сүү” зорилтот төслийг боловсруулах ажлын хэсгийг энэ оны хоёрдугаар сард байгуулжээ.

Тус ажлын хэсэг үйлдвэрлэл, хангамж, хүртээмж, чанар, аюулгүй байдлын талаарх судалгааг ирэх дөрөвдүгээр сарын 1-ний дотор нэгтгэн танилцуулах юм. Одоогийн байдлаар сүү, сүүн бүтээгдэхүүний хэрэгцээний 57 хувийг дотоодын үйлдвэрлэлээр хангаж байна.

Саримсны хэрэгцээний 80 гаруй хувийг дотоодоосоо хангаж байна

Завхан аймаг “Хүнсний хувьсгал” хөдөлгөөний хүрээнд “улаан хальст саримс”-ны тариалалтыг нэмэгдүүлж, нутгийн брэнд болгохоор зорин ажиллаж байна.

Өнгөрсөн намар 117 аж ахуйн нэгж, иргэн 27.76 га талбайд тариалалт хийж 58.1 тонн ургац хураан авчээ. Өнөөдрийн байдлаар Улиастай, Алдархаан суманд 600 гаруй өрх саримс тариалж байгаа бөгөөд сүүлийн гурван жилд тариалагчдын тоо 10 дахин, тариалалтын хэмжээ 11 дахин, ургац 16 дахин өссөн байна. Ингэснээр саримсны хэрэгцээний 80 гаруй хувийг дотоодоос хангаж байгаа бөгөөд цаашид экспортлох зорилготой.

Махны хэрэгцээний 98.7 хувийг дотоодоосоо хангаж байна

Махны үйлдвэрлэлийн хувьд аймаг дотоодын хэрэгцээний 98.7 хувийг хангаж байгаа бөгөөд мах боловсруулах чиглэлээр үйл ажиллагаа явуулж буй аж ахуйн нэгжүүд нийт 243.6 тонн мах боловсруулж, 1930 тонн махыг экспортод гаргажээ.

Гуравдугаар сарын байдлаар 207.4 мянган толгой малыг хүнсэнд хэрэгцээлж 493.5 мянган толгой малыг зах зээлд нийлүүлжээ.

Дотоодын хэрэгцээт төмсний 51 хувийг хангаж байна

Газар тариалангийн салбарт 96 аж ахуйн нэгж, 602 өрх 12.8 мянган га талбайд үйлдвэрлэл эрхэлж, нийт тариалангийн талбайн 15.5 хувийг ашиглаж байна.

2025 онд 178.4 тонн төмс, 1008.8 тонн хүнсний ногоо хураан авсан нь төмсний хэрэгцээний 51 хувь, хүнсний ногооны 30 хувийг дотоодоос хангажээ. Цаашид усалгаатай тариалангийн талбайг нэмэгдүүлж, услалтын системийг сэргээн ашиглалтад оруулснаар усалгаатай талбайг 1522 га-д хүргэх боломжтой гэж үзэж байна. Хүн амын төмс, хүнсний ногооны хэрэгцээг бүрэн хангахад 861 га усалгаатай талбай шаардлагатай байгаа аж.

Ийнхүү “Хүнсний хувьсгал” хөдөлгөөний хүрээнд Завхан аймаг гол нэрийн хүнсний бүтээгдэхүүний дотоодын хангалтыг нэмэгдүүлж, хөдөө аж ахуй, газар тариалангийн салбарыг эрчимжүүлэн хөгжүүлэхэд тодорхой үр дүнд хүрч байна.