О.Цогтгэрэл: Тойрч суугаад сэтгүүлчид ял өгдөг шиг зүйл Н.Алтанхуяг гишүүн дээр гарахвий

Ардчилсан намын бүлэг мэдээлэл хийлээ. АН-ын бүлэг 100 хувийн саналаар Н.Учралыг Улсын Их хурлын даргаасаа татгалзтал Их хурлын үйл ажиллагаанд оролцохгүй байх шийдвэр гаргаснаа хэлсэн юм. Мөн энэ үеэр Н.Алтанхуяг гишүүнийг цагаатгасан шийдвэрийг хүчингүй болгосон асуудалд байр суурь илэрхийллээ. Төрийн эрх барьж буй намынхан тойрч сууж байгаад сэтгүүлчид ял өгдөг шиг Н.Алтанхуяг гишүүний асуудлыг шийдэж байгаа юм биш биз дээ гэж хардаж буйгаа АН-ын дарга О.Цогтгэрэл илэрхийлсэн. Мөн тэрбээр, "Н.Алтанхуяг гишүүний шүүхийн процесс дээр шүүхэд эргэлзэх эргэлзээ гарч байна. Гурван шатны шүүхээр яваад цагаатгасан хэргийг яг өмнөх бүрэлдэхүүн нь өөрөөр шийдэж байгаа юм. Уг нь шүүгч хүн чинь өөрийн итгэл үнэмшлээрээ шийдэх ёстой биз дээ. Сарын дотор хоёр өөр итгэл үнэмшилтэй байж болох уу? " гэв.