Б.Энхтүвшин: Ойрын гурван сард энгийн АИ92 дээр үнийн өөрчлөлт гарахгүй

Аж үйлдвэр, эрдэс баялгийн дэд сайд Б.Энхтүвшин цаг үеийн асуудлаар мэдээлэл хийлээ. Тэрбээр, "Иран, Америкийн дайнтай холбоотойгоор дэлхийн нефть бүтээгдэхүүний зах зээлд тодорхой өөрчлөлтүүд гарч байна. Дэлхийн нефтийн хамгийн чухал усан тээврийн Ормузын хоолой Иран болон Оман улсын хооронд байрладаг. Үүгээр дэлхийн нефть бүтээгдэхүүний 20 орчим хувийг дамжуулдаг. Энд тодорхойгүй нөхцөл үүссэн. Улмаар брэнт маркийн газрын тосны үнэ ойролцоогоор 30 хувиар өсжээ. Энэ нь манай хил үнэд шууд нөлөөлнө" гэлээ. АИ92 авто бензиний нийлүүлэлтийн үнэ тогтворжсон. Гэрээ 2026 оны арванхоёрдугаар сарын 31 хүртэл үйлчилнэ. Тонн тутмын үнэ 705 орчим ам.доллар. Гэхдээ үнэ 30 хувиар дээш, доош савлавал аль нэг улсынх нь санаачилгаар үнэд өөрчлөлт орно гэсэн заалттай. Ойрын 3 сардаа энгийн АИ92 шатахууны үнэд өөрчлөлт гарахгүй гэж ойлгож болно. Үнэ чөлөөлсөн Евро5 дизель түлш, Евро92 шатахууны үнэ хэлбэлзэхийг үгүйсгэхгүй. Гэхдээ ойрын 7 хоногтоо хэлбэлзэхгүй байх гэж бодож байна.  Монгол Улс өнөөдрийн байдлаар АИ92 шатахууны 40 хоногийн нөөцтэй байна. ОХУ-тай байнгын холбоотой байгаа. Албан тоот хүргүүлж гэрээгээр хүлээсэн үүргээ биелүүлж манай улсыг нефтээр тогтвортой хангаж байгаад талархал илэрхийлж байна. ОХУ Евро-5 төрлийн нефтийн бүтээгдэхүүнийг багтах саваараа авч болно гэдэг. Энгийн АИ92 шатахууныг 60-70 мянган тонныг сард аваад явж байна, үүнийг тогтмол нийлүүлнэ, санаа зоволтгүй гэдгийг хэлж байгаа гэлээ. 

Гэхдээ нөхцөл байдал яаж өөрчлөгдөхийг хэлж мэдэхгүй, тодорхой хэмжээний өөрчлөлт гарахыг үгүйсгэхгүй гэх байр суурийг мөн илэрхийлсэн юм.