НӨАТ-ын хувийг бууруулж 5 хувь болгох өргөдөлд гарын үсэг авч эхэлжээ

НӨАТ нь бараа, үйлчилгээний нэмүү өртөг дээр үнэлдэг ерөнхий, өргөн хүрээний хэрэглээний татвар юм. Далд эдийн засгийг бууруулах, ДНБ-ний бодит өсөлтийг хянахад чухал ач холбогдолтой. Тиймээс үндсэн агуулгаараа бараа ажил үйлчилгээний эргэлт, түүний эдийн засгийн ач холбогдлыг бүртгэх зорилгын хүрээнд бусад төрлийн албан татвараас ялгаатай байх ёстой гэж үзэж байгаа тул татварын хуулинд нэмэлт өөрчлөлт оруулахад иргэд дэмжигчдээс дэмжлэг авах хүсэлтэйгээр "НӨАТ-ын хувийг бууруулж 5 хувь болгох, буцаан олголтыг 2 хувь хэвээр үлдээх" өргөдөлд иргэдийн гарын үсгийг цуглуулж эхэлжээ. 

Нийтийн өргөдөл гомдлын системд уг өргөдөл 3 дугаар сарын 10-ны өдөр байршиж гарын үсэг цуглуулж эхэлсэн. Өргөдөлд гарын үсэг зурах хугацаа нэг сарын турш үргэлжлэх бөгөөд дэмжсэн иргэдийн тоо 100 мянгад хүрвэл уг асуудлыг УИХ-ын чуулганаар хэлэлцэх боломж бүрдэх юм. 

Өнөөдрийн байдлаар өргөдөлд 523 хүн гарын үсэг зуржээ. Өргөдөлд гарын үсэг зурахыг хүсвэл https://petition.parliament.mn... линкээр нэвтрэх боломжтой юм.