ГЭР БҮЛ ТӨЛӨВЛӨЛТ УЛС ҮНДЭСТЭН ХӨГЖИХӨД ЧУХАЛ АЧ ХОЛБОГДОЛТОЙ

2016 оны байдлаар гэрлэлтээ батлуулж буй 40 хосын 10 нь эрсдэлтэй буюу гэрлэлтээ цуцлуулах магадлалтай гэсэн харамсалтай судалгаа гарч байсан. Нийт гэрлэлтээ батлуулж буй иргэдийн 72%-ийг 20-29 насны залуучууд бүрдүүлдэг. Монгол улс өнгөрсөн хорин жилд эх, хүүхдийн эндэгдлийг бууруулахад ахиц гаргасан хэдий ч гэр бүл төлөвлөлтийн хэрэгцээг хангах явдал 2003-2013 оны хооронд 94%-иас 77% болон буурч, үр хөндөлтийн хувь хэмжээ тогтмол өндөр байгаа нь гэр бүл төлөвлөлтийн хангагдаагүй хэрэгцээг шийдвэрлэх цаг болсныг анхааруулж байна. Иймд эмэгтэйчүүд болон хосуудыг гэр бүл төлөвлөлтийн үйлчилгээ, мэдээллээр хангах нь чухал ач холбогдолтой болохыг НҮБ-ын Хүн амын сангийн суурин төлөөлөгч Наоми Китахара онцолж, "Хэзээ, хэдэн хүүхэдтэй болохоо хувь хүмүүс чөлөөтэй шийдэх нь олон улсад хүлээн зөвшөөрөгдсөн хүний эрх. Харин Эмэгтэйчүүд болон залуу хосууд хэзээ, хэдэн хүүхэд төрүүлэхээ төлөвлөдөг болсноор сургуулиа төгсөж, амьжиргаагаа сайжруулан, орлогоо өсгөж, улсынхаа эдийн засгийн хөгжилд томоохон хувь нэмэр оруулдаг болох нь нотлогдсон" гэв. Манай улсын хувьд гэр бүл салалтын шалтгааныг гэр бүл төлөвлөлтийн талаарх бодитой мэдээллийг хүн амынхаа хэрэгцээт бүлэгт хүргэж чаддаггүй болон ажилгүйдэл, ядуурлын хэмжээ тогтмол нэмэгдэх хандлага ажиглагдаж байгаатай холбон тайлбарлалаа.

С.Долгорсүрэн