Ерөнхий сайд нараас УИХ-ын гишүүн Н.Алтанхуяг ганцаараа сонсголд оролцоно

“Оюутолгой бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх" түр хорооны сонсгол эхэллээ.

Сонсголд үе үеийн Ерөнхийлөгч, УИХ-ын дарга, Ерөнхий сайд тэргүүтэй нийт 300 гаруй хүн гэрчээр дуудагдаад байгаа юм. Тэд нотлох баримтын хүрээнд 2006 оноос хойш сүүлийн 20 жилийн туршид Оюутолгойтой холбоотой асуудлаар шийдвэр гаргасан, ажлын хэсэгт орсон албан тушаалтнууд болон холбогдох байгууллагуудын төлөөлөл юм.

Сонсголын эхний өдөр  "Жавхлант", "Шивээ толгой" ашиглалтын тусгай зөвшөөрөл, хөрөнгө оруулалтын гэрээтэй холбоотой асуудлыг хэлэлцэж байна. 

Сонсголд дуудагдсан үе үеийн албан тушаалтнууд оролцох эсэх талаар мэдээллээ түр хороонд ирүүлсэн мэдээлэлд Ерөнхий сайд нараас  УИХ-ын гишүүн Н.Алтанхуяг ганцаараа сонсголд оролцохоо илэрхийлсэн бол Сү.Батболд, С.Баяр нар оролцохгүй гэжээ. Харин Ч.Сайханбилэг, М.Энхболд, Л.Оюун-Эрдэнэ, Г.Занданшатар нар оролцох эсэх нь тодорхойгүй байна.