Улаанбурхан өвчнөөр нас барсан нийт тохиолдлын 87% нь 1 нас хүрээгүй хүүхдүүд байна

Улаанбурхан өвчний халдвар нэмэгдэж байгаатай холбоотойгоор бүртгэгдсэн нас баралтын дийлэнх нь нялх хүүхдүүдэд тохиолдож байгаа талаар эрүүл мэндийн байгууллагууд анхааруулж байна. Бүртгэгдсэн нийт нас баралтын 87 хувь нь 1 нас хүрээгүй хүүхдүүдэд тохиолджээ. 

1 нас хүрээгүй хүүхдүүдийн дархлаа бүрэн тогтоогүй байдаг тул халдварт өвчинд өртөх эрсдэл өндөр байдаг аж. Мөн энэ насны хүүхдүүд улаанбурхан өвчний вакцинд бүрэн хамрагдаагүй байх тохиолдол элбэг байдаг нь өвчний хүндрэл, нас баралтын эрсдэлийг нэмэгдүүлдэг байна.

Улаанбурхан нь амьсгалын замаар халдварладаг, маш хурдан тархдаг халдварт өвчин бөгөөд халуурах, тууралт гарах, ханиах, нүд улайх зэрэг шинж тэмдгээр илэрдэг. Хүндэрсэн тохиолдолд уушгины хатгалгаа, тархины үрэвсэл зэрэг ноцтой хүндрэл үүсэх эрсдэлтэй.

Эрүүл мэндийн байгууллагууд эцэг эх, асран хамгаалагчдад хүүхдээ товлолт дархлаажуулалтад цаг тухайд нь хамруулах, халуурах, тууралт гарах зэрэг шинж тэмдэг илэрвэл яаралтай эмчид хандахыг зөвлөж байна. Мөн халдвараас сэргийлэхийн тулд олон нийтийн газраар бага насны хүүхдийг дагуулж явахгүй байх, ариун цэврийг сайтар сахихыг анхааруулж байна.

Мэргэжилтнүүдийн зүгээс улаанбурхан өвчнөөс урьдчилан сэргийлэх хамгийн үр дүнтэй арга нь вакцинжуулалт бөгөөд дархлаажуулалтын хамрагдалтыг нэмэгдүүлэх нь чухал гэдгийг онцолж байна.