Үе тэнгийн дээрэлхэлт үйлдсэн хүүхэд 14-с дээш настай бол хуулийн хариуцлага хүлээнэ

Цахим орчинд тархсан бичлэг үе тэнгийн дээрэлхэлтийн асуудлыг дахин анхаарлын төвд авчирлаа.

2026 оны гуравдугаар сарын 9-ний шөнө ерөнхий боловсролын сургуулийн ахлах ангийн сурагчид нийлж нэгнээ дээрэлхэж, зодож буй бичлэг цахим орчинд тархсан. Цагдаагийн байгууллагаас тодруулахад, бүлэг сурагчид эмэгтэй сурагчийг зодож, биед нь халдсан нь тогтоогдсон байна. Уг хэрэгт 14-17 насны найман хүүхдийг холбогдуулан шалгаж байгаа талаар албаны эх сурвалж мэдээлжээ.

Хэрэв хүндэвтэр гэмтэл учруулсан нь тогтоогдвол гурван жил, хүнд гэмтэл учруулсан бол 8-12 жил хүртэл хорих ялаар шийтгэх эрх зүйн зохицуулалттай аж.

Гэвч энэ нь ганц тохиолдол биш юм. Энэ онд үе тэнгийн дээрэлхэлтийн улмаас 2200 гаруй хүүхэд хохирсон тохиолдол цагдаагийн байгууллагад бүртгэгджээ. Мөн насанд хүрээгүй хүүхэд гэмт хэрэгт холбогдсон 1050 тохиолдол бүртгэгдсэн байна.

Энэ нь 10 хүүхэд тутмын 8 нь ямар нэг байдлаар дарамт, хүчирхийлэлд өртөж байсан гэсэн үг юм. Үе тэнгийн дээрэлхэлт ихэвчлэн сургуулийн орчинд гардаг бөгөөд нийт тохиолдлын 45 хувь нь ахлах ангийн сурагчдын дунд үйлдэгддэг байна.

Үе тэнгийн дээрэлхэлт гэдэг нь бусдын бие махбод болон сэтгэл санаанд хохирол учруулах зорилгоор ганцаар болон бүлэглэн, давтамжтайгаар үйлдэх түрэмгий зан үйл юм. Үүнд өдөж уурлуулах, хочлох, элэглэн шоолох, айлгах, дарамтлах, ганцаардуулах, цуурхал тараах зэрэг үйлдлүүд багтдаг.

Сүүлийн үед энэ асуудлыг бууруулах зорилгоор дээрэлхэлт үйлдсэн сурагчийн зөрчлийг хувийн хэрэгт нь тэмдэглэдэг болох талаар судалж эхэлжээ. Ингэснээр их, дээд сургуульд суралцах, ажлын байранд орох, гадаадад зорчих зэрэгт тодорхой хязгаарлалт үүсч болзошгүй гэж үзэж байна.

Зарим хүмүүс ийм зохицуулалт нь дээрэлхэлтийг бууруулахад нөлөөлнө гэж үзэж байгаа бол нөгөө хэсэг нь хүүхдийн эрхийг зөрчих эрсдэлтэй хэмээн болгоомжилж байна. Учир нь өсвөр насанд гаргасан алдаа нь тухайн хүүхдийн ирээдүйд хэт том сөрөг үр дагавар авчирч болзошгүй юм.

Тиймээс зарим мэргэжилтнүүдийн үзэж буйгаар, сургуулийн орчинд дээрэлхэлтийг бууруулах бодит арга хэмжээг хэрэгжүүлэх нь хамгийн чухал аж. Хэрэв зайлшгүй хувийн хэрэгт тэмдэглэх шаардлагатай бол тухайн хүүхэд насанд хүрч, бүрэн төлөвшсөний дараа уг тэмдэглэлийг хасах боломжтой байх ёстой гэж үзэж байна.

Үе тэнгийн дээрэлхэлт зөвхөн бичлэг нь сошиал орчинд тархсан үед л анхаарал татаж, арга хэмжээ авдаг асуудал хэвээр байх ёстой юу гэдэг асуулт олон нийтийн дунд хөндөгдсөөр байна.