Ш.Ёл: Орон нутагт мал эмнэлгийн салбарыг онцгой анхаарах шаардлагатай байна

Өнөөдөр /2026.03.09/ аймгийн Засаг дарга Ш.Ёл, Мал эмнэлгийн Ерөнхий газрын дарга Б.Батсүх, ХХААХҮЯ-ны Санхүү, Хөрөнгө оруулалтын газрын дарга Г.Болорсүх, Хөдөө аж ахуйн корпораци ТӨХХК-ийн гүйцэтгэх захирал Б.Цогтсаран нарыг хүлээн авч уулзжээ.

Аймгийн Засаг даргын зүгээс малын гоц халдварт өвчнөөс урьдчилан сэргийлэх вакцины нийлүүлэлт, хангалт, хадгалалт, сумдын мэргэжлийн боловсон хүчний нөөц болон аймаг, орон нутгийн удирдлагуудтай уялдаа холбоотой ажиллаж, аливаа малын халдварт өвчнөөс урьдчилан сэргийлэх, хариу арга хэмжээ авахад мэргэжил, аргазүйн зөвлөгөө өгч хамтран ажиллах шаардлагатай байгаа тухай саналаа хэлсэн байна. 

Мөн Дорнод аймгийн Хэрлэн суманд аймгийн төсвийн хөрөнгө оруулалтаар Агро парк байгуулахаар төлөвлөн ажиллаж байгаа ба энэ хүрээнд усалгааны системийг шийдвэрлэх, Хөдөө аж ахуйн корпорациас явуулж буй хөдөө аж ахуйн техникийн түрээсийн үйлчилгээнд хамрагдах зэрэг дэмжлэг үзүүлж ажиллах, малын үржлийн аж ахуй, хамгаалалттай аж ахуйг байгуулах аж ахуй нэгжүүдийг дэмжих, малчдад олгох малын битүү саравчийг Дорнод аймгийн хаваржилт хүндэрсэн сумдад хуваарилахад анхаарах зэрэг Засаг даргын тавьсан саналуудыг ХХААХҮЯ болон Мал эмнэлгийн ерөнхий газраас дэмжиж ажиллахаа илэрхийлжээ.