Томоохон бүтээн байгуулалтад дотооддоо үйлдвэрлэсэн ган төмөр ашиглана

Нийслэлийн томоохон бүтээн байгуулалтын ажлуудад дотооддоо үйлдвэрлэсэн ган төмөр авахаар төлөвлөж байна.

Тухайлбал, ДЦС-5, Тойрог хурдны зам, Туулын хурдны зам зэрэг ажил хийхэд төмрийн хэрэглээ нэмэгдэнэ. “Сэлбэ 20 минутын хот” төслийн ажилд оролцож буй барилгын компаниудад арматураа дотоодын үйлдвэрээс авах чиглэл өгсөн. Ойрын хугацаанд Дарханы төмөрлөгийн болон бусад үйлдвэртэй танилцана гэдгээ нийслэлийн Засаг дарга бөгөөд Улаанбаатар хотын Захирагч Х.Нямбаатар Багануур дүүрэгт үйл ажиллагаа явуулдаг ган төмөрлөгийн “Месес” үйлдвэрт ажиллах үеэрээ онцлов.

Багануурын үйлдвэр технологийн паркийн ажлыг эрчимжүүлэхээр эрчим хүчний асуудалд нь анхаарч, нийслэлээс өнгөрсөн онд хөрөнгө оруулж, 6.3 км шугам холбожээ. Манай улсын гангийн жилийн дундаж хэрэглээ 300 мянга орчим тонн байдаг бол гадны хөрөнгө оруулалттай “Месес” компани жилд 100-120 мянган тонн ган төмөр үйлдвэрлэх хүчин чадалтай юм.

“Месес” ХХК-ийн захирал С.Амарбат “Манай үйлдвэр энэ онд бүрэн хүчин чадлаараа ажиллана. Дөрөвдүгээр сарын 10-наас ажлаа эхлүүлнэ. Түүхий эдийн олдоц хэвийн байгаа. Цаашид хүдэр хайлуулах нэг зуух ашиглалтад оруулахаар ТЭЗҮ-ийг хийж байна” гэв.

Тус үйлдвэр нь 25 сая ам.долларын хөрөнгө оруулалтаар металлургийн дэвшилтэт технологи тоног төхөөрөмж, төмөр боловсруулах үйлдвэрлэлийн технологи, цэвэршүүлэх зуух ашиглан цельсийн 1080-3060 градуст төмөр хайлуулан, 150 мм-ийн голчтой босоо хэвд цутгаж тасралтгүй цувих аргаар стандартын чанарын шаардлага хангасан ган туйван үйлдвэрлэдэг ажээ.