Сургуулийн эмч нарын уулзалт, хэлэлцүүлэг зохион байгуулагдлаа

Эрүүл ирээдүйг төлөвшүүлэхийн тулд цэцэрлэг, сургуулийн наснаас нь эрүүл мэндийн мэдлэг, боловсрол олгох, тэдний эрүүл мэндийг хамгаалах дэмжих, эмгэгийг эрт илрүүлж шаардлагатай тусламжид хамруулах нь нэн чухал юм. 2024 оноос эхэлсэн зургаан настануудын зүрх, шүд, нүдний үзлэг, оношилгоог зохион байгуулагдснаар сургуульд суурилсан эрт илрүүлгийн үндэсний тогтолцоо бүрдүүлэх ажлын эхлэл тавигдсан юм.

Энэхүү тогтолцоог бүрдүүлэх ажлыг дэмжих зорилгоор “Эрүүл Монгол хүн” үндэсний хөдөлгөөн, Боловсролын Ерөнхий газар, Монгол Улсын хүүхэлдэйн театр, Орбис олон улсын байгууллага хамтран ерөнхий боловсролын сургуулийн эмч нарын уулзалт хэлэлцүүлэг зохион байгуулав. Уулзалт, хэлэлцүүлэгт Нийслэлийн 9 дүүргийн төрийн болон төрийн бус өмчийн ЕБС-ийн 200 орчим сургуулийн эмч хамрагдлаа.

ЕБС-ийн суралцагчдад эрүүл мэндийн боловсрол олгох ажлын хүрээнд ЕБС бүрд “Эрүүл Монгол хүн” клуб байгуулагдах ажил эрчимжиж одоогийн байдлаар 338 сургууль дээр тус клуб байгуулагдан ажиллаж эхэлсэн.

“Эрүүл Монгол хүн” клуб нь хүүхдийг хүүхдээр дамжуулж хөгжүүлэхээс гадна хүүхдүүдээр дамжуулж аав ээжид нь эрүүл мэндийн боловсрол олгох юм. “Эрүүл Монгол хүн” клуб нь сургуулийнхаа эмч болон нийгмийн ажилтантай хамтран ажиллаж эрүүл мэндийн боловсрол олгох хөтөлбөрийн хүрээнд үйл ажиллагаа явуулна.