“Шударга байдлын үнэлгээ”-ээр Сэлэнгэ аймаг улсдаа 5 дугаар байрт үнэлэгдлээ

“Шударга байдлын үнэлгээ” Авлигатай тэмцэх газраас жил бүр зохион байгуулдаг төрийн байгууллагуудын 2026 оны дүнгээр Сэлэнгэ аймгийн Засаг даргын Тамгын газар улсдаа 5 дугаар байрт үнэлэгдлээ.

Аймгийн Засаг дарга Н.Лхагвадорж: -“Шударга байдлын үнэлгээгээр улсдаа эхний тавд багтсан нь аймгийн төрийн албан хаагчдын сахилга хариуцлага, ил тод байдлыг эрхэмлэсэн хамтын ажиллагааны үр дүн юм. Бид цаашид авлигын эрсдэлийг бууруулах, төрийн үйлчилгээг илүү хүртээмжтэй, нээлттэй болгоход онцгой анхаарч ажиллана. Иргэдийн итгэл бол төрийн байгууллагын хамгийн чухал үнэлгээ гэдгийг бид үргэлж баримтална” хэмээн онцоллоо.

Тус үнэлгээг Монгол Улсын 21 аймгийн Засаг даргын Тамгын газруудын үйл ажиллагаанд хийсэн судалгаанд үндэслэн гаргадаг байна. Сэлэнгэ аймаг өмнөх оноос 10.9 хувиар ахисан үзүүлэлттэйгээр эхний тавд багтжээ.

“Шударга байдлын үнэлгээ”-г төрийн байгууллагын ил тод байдал, авлигын эрсдэлийн удирдлага, ёс зүйн тогтолцоо, иргэдийн үнэлгээ, үйлчилгээний чанар, цахим шилжилтийн түвшинг хамарсан олон талт шалгуураар дүгнэдэг байна.

Сэлэнгэ аймгийн Засаг даргын Тамгын газар тайлант хугацаанд:

-Төсөв, санхүү, худалдан авах ажиллагааны мэдээллийг тогтмол ил тод байршуулсан,

-Авлигын эсрэг үйл ажиллагааны төлөвлөгөө батлан хэрэгжилтийг хангасан,

-Албан хаагчдын ёс зүйн хариуцлагыг дээшлүүлэн сургалт, дотоод хяналтыг тогтмолжуулсан,

-Иргэдийн өргөдөл, гомдлын шийдвэрлэлтийг шуурхай болгож, цахим үйлчилгээг өргөжүүлсэн зэрэг бодит ажлуудыг хэрэгжүүлэн ажиллажээ.

Сэлэнгэ аймаг ийнхүү шударга, нээлттэй засаглалыг бэхжүүлэх чиглэлээр гаргасан ахиц амжилтаа бататган, цаашид ил тод байдал, хариуцлагын тогтолцоог улам боловсронгуй болгох зорилт дэвшүүлээд байгаа юм.