Чингэлтэй дүүргийн 117 дугаар сургуулийг хийн түлшинд шилжүүлжээ

Агаарын бохирдлыг бууруулах ажлын хүрээнд сургууль, цэцэрлэгийн уурын зуухыг газ руу шилжүүлэх ажлын судалгаа хийж, төлөвлөгөөний дагуу цаг хугацаандаа бодит ажил болж, хүүхдүүд дулаан тав тухтай орчинд сурч, хөгжих боломжтой болж байна.  Чингэлтэй дүүргийн 117 дугаар сургуульд хийн түлшинд шилжүүлэх ажлыг нийгмийн хариуцлагын хүрээнд  “ГАЗКОМ” ХХК хийж гүйцэтгэжээ. Уг ажилтай УИХ-ын гишүүн С.Одонтуяа танилцаж, улсын төсвөөс нэг ч төгрөгийн зардал гаргалгүйгээр уурын зуухны утааг тэглэсэнд талархал илэрхийлсэн юм. 

Тус сургууль жилд 580 тонн түүхий нүүрс түлдэг байсан. Энэ халаалтын зуухыг буулгаж, шингэрүүлсэн хийн түлшинд шилжүүлснээр түүхий нүүрсний хэрэглээг зогсоож, агаарт 2320 тонн хорт бодис ялгарахаас сэргийлж чадсан байна. Мөн олон давуу талууд бий болсноос гадна санхүүгийн хувьд ч хэмнэлттэй болжээ. Өнөөдрийн байдлаар гурван сургуулийн дулааныг хийн түлшинд шилжүүлж, халаалтын үйл ажиллагаа нь жигдэрчээ.