Иранд цохилт өгснөөр газрын тосны үнэ огцом өслөө

Израил болон АНУ өнгөрсөн амралтын өдрүүдэд Иран руу цуврал цохилт өгсний дараа газрын тосны зах зээлд нийлүүлэлт тасалдах эрсдэл нэмэгдэж, үнэ огцом өсөөд байна.

Азийн биржүүдийн арилжаа эхлэх үед Brent маркийн газрын тосны үнэ 13 гаруй хувиар өсөж, нэг торх нь 82.0 ам.долларт хүрсний дараа бага зэрэг буурчээ. Шинжээчдийн үзэж буйгаар энэхүү өсөлт нь Ойрх Дорнод дахь нөхцөл байдал хурцадсантай холбоотой аж.

ANZ олон улсын санхүүгийн группийн шинжээчид “Ираны хариу довтолгоо өргөжиж, Ормузын хоолой дахь газрын тос тээвэрлэгч хөлөг онгоцуудад цохилт өгч байгаа нь нийлүүлэлтийн тасалдлын эрсдэлийг мэдэгдэхүйц нэмэгдүүлж байна” гэж мэдэгдсэн байна.

Цохилтын үеэр Ираны дээд удирдагч Али Хаменеи болон хэд хэдэн өндөр албан тушаалтан, мөн олон зуун иргэн амиа алдсан талаар мэдээлжээ. Үүний хариуд Иран улс Израил болон Бахрейн, Кувейт, Катар, Арабын Нэгдсэн Эмирт Улс дахь Америкийн байгууламжууд руу пуужингаар довтолсон байна. Мөн Ормузын хоолойгоор дамжин өнгөрч байсан хэд хэдэн хөлөг онгоц руу халдсан нь зах зээлд богино хугацааны доголдол үүсгэж болзошгүйг шинжээчид анхааруулжээ.

Ормузын хоолой нь дэлхийн газрын тосны тээвэрлэлтийн 20 орчим хувь дамжин өнгөрдөг стратегийн чухал бүс нутаг юм. Ням гаргийн уулзалтаар Газрын тос экспортлогч орнуудын байгууллага болон түүний түнш орнууд олборлолтоо өдөрт 206 мянган торхоор нэмэгдүүлэхээр тохиролцсон нь болзошгүй нийлүүлэлтийн тасалдлыг тодорхой хэмжээнд нөхөх зорилготой гэж үзэж байна.