Б.Амарсайханы хоёр дахь хохирогчийн аав “Хүүхдүүдээ хамгаалаарай”

Өнгөрөгч оны долоодугаар сард Сүхбаатар дүүргийн 3-р хорооны нутаг дэвсгэр буюу Хүүхдийн 100-д байрлах "Канте" шөнийн цэнгээний газрын гадна УИХ-ын гишүүн асан Цэрэнпунцагийн хүү Санжаачойпэл, “Эрэл” группийг үүсгэн байгуулагч Эрдэнэбатын хүү Тэмүүлэн, "Говь" ХК-ийн Гүйцэтгэх захирал Б.Амарсайхан нар нийлж, бусдын биед халдаж, эрүүл мэндэд нь хохирол учруулсан хэрэгт холбогдож байсан. Олон нийтийн газар ёс зүйгүй авирлаж, бүлэглэн танхайрсан энэ хэргийн шүүх хурал зургаан сар гаруй үргэлжилсэн ч хэн ч хорих ял сонсоогүйд олон нийт шүүмжлэлтэй хандаж байсан. 

Тэгвэл өмнөх хэрэг нь шийдэгдээд удаагүй байтал "Говь" ХК-ийн Гүйцэтгэх захирал Б.Амарсайхан дахин зодооны хэрэгт холбогдсон талаарх мэдээллийг хүргэсэн. Тодруулбал, энэ сарын 15-ны 05:00 цагийн орчимд Сүхбаатар дүүргийн 3-р хорооны нутаг дэвсгэрт хүмүүс зодолдож байна гэх дуудлага цагдаагийн байгууллагад бүртгэгдсэн байна. Уг зодоонд Б.Амарсайхан байсан гэх мэдээллийг цагдаагийн байгууллага баталсан.  

Зорчих эрхээ найман сарын хугацаанд Хан-Уул дүүргээр хязгаарлуулсан Б.Амарсайхан Сүхбаатар дүүрэгт дахин нэг хэрэгт холбогдсон нь эрх дархтнуудын хүүхдүүд бага ял шийтгэл сонсдог, авсан ялаа ч эдэлдэггүй гэх хардлагыг төрүүлж олон нийтийг бухимдуулаад буй. Тэгвэл 2026.02.14- нд болсон хэргийн хохирогч хүүгийн аав өөрийн цахим хуудаснаа ийн бичжээ.

Хүүхдүүдээ хамгаалаарай!

Миний хүү 2026.02.14 нд Таванбогдын Баатарсайханы хүү Амарсайханы өдөөн турхирсан бүлэг залууст зодуулсан нь үнэн. Шударга хэвлэл мэдээллийн хэрэгсэл байдаг бол надтай холбогдож мэдээлэл аваарай. Хүлээцтэй хараад байсан чинь хохирхоод өнгөрөх янзтай шүү.