Баярын өдрүүдэд 1878 хүн осол, гэмтлийн улмаас яаралтай тусламж авчээ

Цагаан сарын баярын өдрүүдэд Гэмтэл Согог Судлалын Үндэсний Төв-ийн Яаралтай тусламжийн тасагт нийт 1878 хүн осол, гэмтлийн шалтгаанаар ханджээ. Тус мэдээлэл нь хоёрдугаар сарын 18-22-ны өдрүүдэд бүртгэгдсэн үзүүлэлт юм. Нийт тохиолдлын 36.6 хувь буюу 687 нь 0–18 насны хүүхдүүд байгаа бол уналт хамгийн өндөр хувийг эзэлсэн байна. 

Осол гэмтлийн шалтгааныг ангилбал:

Уналт – 775 тохиолдол (41.3%)

Амьгүй механик хүчинд өртөх (хөдөлгүүртэй болон хөдөлгүүргүй хэрэгсэл, ахуйн орчны нөлөөлөл) – 342 тохиолдол (18.2%)

Зам тээврийн осол – 240 тохиолдол (12.8%)

Амьтай механик хүчинд өртөх (нохойд хазуулах, санамсаргүй цохиулах, барилгад нөлөөлөгдөх) – 161 тохиолдол (8.6%), үүнээс нохойд хазуулсан 49

Түлэгдэлт – 83 тохиолдол (4.4%)

Хөлдөлт, осголт – 11 тохиолдол (0.6%)

Баярын өдрүүдэд уналт, хүүхдийн гэмтэл, зам тээврийн осол нэмэгдэх хандлагатай байгааг дээрх статистик тоо харуулж байна. Иймд иргэд баярын өдрүүдэд архи согтууруулах ундааны хэрэглээгээ хянах, замын хөдөлгөөнд болгоомжтой оролцох, бага насны хүүхдэд тавих хараа хяналтыг сайжруулах шаардлагатай байгааг мэргэжилтнүүд зөвлөж байна.