Бүх цэргийн Их хар сүлдний цагаалах тайлга боллоо

XVII жарны гал морин жилийн хаврын тэргүүн сарын шинийн 5-ны билэгт сайн энэ өдрийн морин цагт Бүх цэргийн их Хар сүлдний цагаалах тайлгыг зохион байгууллаа.

Бүх цэргийн их Хар сүлд нь цэргийн сүр хүчний бэлгэдэл, сүслэн дээдлэх оройн дээд шүтээн юм. Их сар сүлдийг цэнгүүлэх тайлгыг хоёр жил тутамд Төв аймгийн Эрдэнэ сумын нутагт, цагаалах тайлгыг жил бүр Хар сүлдний өргөөнд хийдэг журамтай.

Бүх цэргийн их Хар сүлдний цагаалах тайлгын ёслолд УИХ-ын гишүүн, Засгийн газрын гишүүн Батлан хамгаалахын сайд Д.Батлут, ЗХЖШ-ын дарга дэслэгч генерал С.Ганбямба, БХЯ-ны Төрийн нарийн бичгийн дарга хошууч генерал Д.Ганхуяг тэргүүтэй БХЯ, ЗХЖШ-ын удирдлага, бие бүрэлдэхүүн түүнчлэн төрийн цэргийн болон хууль сахиулах байгууллагуудын удирдлагууд оролцсон юм.