Дарханд төр хувийн хэвшлийн түншлэлээр дулааны эх үүсвэр барих саналыг Ерөнхий сайдад тавилаа

Монгол Улсын Ерөнхий сайд Г.Занданшатар Дархан-Уул аймгийн цахилгаан, дулааны хангамжийн найдвартай байдлыг шалгах үүднээс тус аймгийн ДЦС-д ажиллав. 

Дарханы ДЦС нь 83 МВт хүчин чадалтай, нийтдээ есөн зуух ажиллуулж байна. 1965 онд ашиглалтад орсон тус станцын турбин генераторуудыг шинэчлэх шаардлага үүссэн бөгөөд 120 мянга цаг ажиллуулах ёстой турбин генераторууд 288-359 мянган цаг буюу ашиглалтын хугацаа 3 дахин хэтэрчээ. 

Дархан-Уул аймагт 2025 онд 3800 орчим хүн шилжин ирж, мөн 1300 айлын орон сууц ашиглалтад орсон байна. Энэ хэрээр 2021 оноос хойш төсвийн орлого нь 3 дахин нэмэгдэж, эдийн засаг нь гурван жилийн хугацаанд хоёр дахин тэлжээ. 

Тиймээс цахилгаан, дулааны шинэ эх үүсвэр шаардлагатай байгаа тул төр хувийн хэвшлийн түншлэлээр төсөл хэрэгжүүлэх саналыг аймгийн удирдлагууд Ерөнхий сайдад тавилаа.

Шинэ эх үүсвэр барих ажлыг шуурхай, цэгцтэй эхлүүлэх ёстойг Ерөнхий сайд Г.Занданшатар онцолж, судалгаа, тооцооллыг шуурхайлж, цэгцлэхийг аймгийн удирдлагуудад үүрэг болгов.