"Милан-Кортина 2026" олимпын сүүлийн уралдаанаараа Б.Ачбадрах 85 дугаар байрт хурдаллаа

Өвлийн XXV олимпын наадмын гүйлтийн цанын эрэгтэйчүүдийн  10 км-ийн цуваа гараатай (чөлөөт тэшилт) уралдаан Тесеро дахь гүйлтийн цанын баазад болж, олон улсын хэмжээний мастер Б.Ачбадрах 85 дугаар байраар бариалав.

Энэхүү уралдаанд гараанаас 113 цаначин гарснаас 111 нь барианд орлоо. Манай цаначин Б.Ачбадрах 25:32.8  амжилтаар барианд орж, 85 дугаар байрт бариалсан байна. Б.Ачбадрах Унгар, Серб, Македон, Аргентин, Лихтенштейн, Чили, Словак, Иран, Хорват, Нигери, Молдав, Бразил, Венесуэл, Португал, Турк, Колумб, Киргизстан, Энэтхэг, Марокко, Мексик, Иран, Тайвань, Ливан, ӨАБНУ, Саудын Араб, Израйль, Эквадор, Литва, Испани зэрэг орны 28 тамирчныг ардаа орхисон юм. Монгол Улсаа төлөөлөн өвлийн олимпод гурав дахь удаагаа эрхээ аван оролцсон Б.Ачбадрах энэхүү олимпын гурван зайд уралдсанаар ийнхүү тэмцээнээ дуусгаж байна.

Өчигдрийн 10 км-ийн уралдаанд Норвегийн алдарт цаначин Йоханнес Клэбо 20:36.2 хурдалж, “Милан Кортина 2026” олимпийн наадмаас гурав дахь алтан медалиа зүүлээ. Ингэснээр тэр нутаг нэгт Бьорн Дэли, Уле Эйнар Бьорндален, Марит Бьорген нартай эн зэрэгцлээ. Тэгвэл мөнгө, хүрэл медалийг Францын Матис Дэсложес, Норвегийн Эйнар Хедегарт нар хүртсэн байна.