Сар шинийн баярт зориулсан ахмадын барилдаанд дархан аварга А.Сүхбат 56 дахь түрүүгээ хүртлээ

Сар шинийн баярт зориулсан ахмадын бөхийн барилдаанд Монгол Улсын Дархан аварга А.Сүхбат 56 дахь түрүүгээ хүртлээ.  Дархан аварга А.Сүхбат, Улсын начин Л.Цэвээн, Д.Цогзолдорж тэргүүтэй улс, аймгийн цолтой, 50-аас дээш насны 21 бөх зодоглосон юм. Дархан аварга А.Сүхбат аймгийн арслан Ч.Эрдэнэчулууныг зургаа даван түрүүлж их шөвөгт аймгийн начин Б.Пүрэвсүрэн үлдэв.

Тус барилдаанд түрүүлсэний дараагаар сэтгэгдлээ хуваалцахдаа “Монгол бөхийн өргөөнд барилдах шийдвэрийг өчигдөр л гаргасан. Хүү минь өсвөрийн барилдаанд зодоглохоор болж, тэр үеэр ахмадын барилдаан болох гэж байгааг мэдсэн юм. Ойрд барилдаагүй ч үеийн, хамт барилдаж явсан бөхчүүдтэйгээ барилдаж, хөлсөө гаргах бодолтойгоор бүртгүүлсэн. Идэр залуу нас минь дурсамж болон үлдсэн энэ Бөхийн өргөөнд дахин барилдсандаа баяртай байна. Намайг дэмждэг хүмүүс ирж баяр хүргэсэнд чин сэтгэлээсээ талархаж байна.

Удахгүй болох сар шинийн баяраар Монгол түмэн минь элбэг дэлбэг, сар шинэдээ сайхан шинэлээрэй. Сайхан амьдрахын ерөөлийг өргөе” хэмээн мэнд дэвшүүллээ