Аж үйлдвэр эрдэс баялгийн яам ажлын хэрэгжилт тулгамдсан асуудлуудыг хэлэлцлээ

АЖ ҮЙЛДВЭР, ЭРДЭС БАЯЛГИЙН ЯАМ 2026 ОНЫ 02 ДУГААР САРЫН 09-НИЙ ӨДӨР ЭЭЛЖИТ ШУУРХАЙ ХУРАЛДААНАА ЗОХИОН БАЙГУУЛЖ, САЛБАРЫН АЖЛУУДЫН ХЭРЭГЖИЛТ, ТУЛГАМДСАН АСУУДЛУУДЫГ ХЭЛЭЛЦЛЭЭ.

Хурлыг Төрийн нарийн бичгийн дарга Б.Дашпүрэв удирдан явуулж, 2026 оныг Эдийн засгаа өргөтгөх, эрх зүйн шинэчлэлтийн жил болгон зарлаж буйг онцоллоо.

Монгол Улсын эдийн засгийн томоохон тулгуур болсон уг салбарын эрх зүйн орчин нь өнөөгийн цаг үеийн нөхцөл байдалд нийцэн шинэчлэгдэж, боловсронгуй болох шаардлагатайг тэмдэглэж, цаашид эдийн засгийг өргөтгөх, өсөлтийг дэмжих илүү өргөн боломжууд бий болно гэдгийг онцлон мэдэгдэв.

Мөн харьяа газар, нэгжүүдийн ажлын гүйцэтгэл, цаг үеийн тулгамдсан асуудал, холбогдох мэдээлэлтэй танилцаж, цаашид авч хэрэгжүүлэх ажлын талаар дараах чиглэл, үүргийг холбогдох нэгж, албан тушаалтнуудад өглөө.

Үүнд:
Олон улсын байгууллагуудтай байгуулсан санамж бичгүүдийн нэгдсэн жагсаалтыг гаргаж, тэдгээрийн хэрэгжилтийн явц, үр дүнг дүгнэсэн тайланг тогтмол боловсруулах;

2026 оны онцлох, ач холбогдол бүхий ажлуудыг тодорхойлсон үйл ажиллагааны төлөвлөгөөг гаргах;

Албан хаагчид хууль тогтоомжийн дагуу ХАСХОМ буюу хувийн ашиг сонирхол, хөрөнгө орлогын мэдүүлгийг хугацаанд нь үнэн зөв, бүрэн мэдүүлэхэд онцгойлон анхаарч, хяналт, зохион байгуулалтыг сайжруулах;

Салбарын хүрээнд хийж хэрэгжүүлж буй бодлого, арга хэмжээ, ажлын үр дүнг олон нийтэд нээлттэй, ойлгомжтой байдлаар хүргэх, сурталчлах, таниулах ажилд яам болон харьяа байгууллагууд идэвх санаачилгатай оролцох;
Дотоод зохион байгуулалтын хүрээнд албан хаагчдад үүрэг, даалгаврыг “Эйбл” дотоод цахим сүлжээгээр хугацаатайгаар өгч, түүний хэрэгжилтийн тайланг долоо хоног бүр нэгтгэн танилцуулж хэвших;

Яамны дотоод журамд нэмэлт, өөрчлөлт оруулахтай холбогдуулан газар, хэлтсийн дарга нар нийт албан хаагчдын санал, онцлог хэрэгцээг тусгасан саналуудыг нэгтгэн боловсруулах ажлыг зохион байгуулна.