Эмч, багш нар шаардлагаас-ажил хаялт хүртэл зарлан байж нэмүүлсэн цалингаа авч чадахгүй байна гэв

2025 онд шаардлагаас-ажил хаялт хүртлээ тэмцэж цалингаа нэмүүлэх зөвшилцөлд хүрсэн ч цалин нэмэгдэхгүй байгаа талаар МҮЭ-ийн холбоо, МБШУҮЭХ, МЭМАҮЭХ-ноос мэдэгдэл хийлээ. 

МБШУҮЭХ-ны дарга З.Цогтгэрэл: 

Боловсролын салбарынхан цалингаа нэмүүлэх биш бүр хасуулчихлаа гэж гомдлыг ирүүлээд байна.  Өнөөдрийн байдлаар бид бүхний 2026 оны нэгдүгээр сарын 1-ээс цалин хөлс 50%-аар нэмэгдүүлэх асуудал бодит байдал дээрээ өөр байна. Монгол Улсын Засгийн газар хэлэлцээрээр хүлээсэн үүргээ биелүүлэхийг дахиад шаардаж байна.

Монголын боловсрол шинжлэх ухааны салбарт хүний нөөцийн дутагдал, хөдөлмөрийн мөлжлөг, боловсролын чанарын хүртээмж, судалгаа шинжилгээний ажил доод түвшинд байгаа. Энэ байдлыг сайжруулахын төлөө улс орны хөгжлийг хойшид нь нэмэгдүүлэхийн төлөө ажиллаж байгаа. Цалин нэмэхийг шаардаж суулт жагсаал цуглаан ажил хаялт үргэлжилсэн энэ асуудлыг нийгэмд олон нийт, эцэг эхчүүд, хэвлэл мэдээлэл УИХ-ын гишүүд Засгийн газартай удаа дараа уулзаж шийдэлд хүрсэн. Тэгвэл өнөөдөр яаж хэрэгжиж байгаа юм бэ гэдэг асуудал туйлын хангалтгүй байна. Шаардлагын хүлээж авчихаад биелүүлэхгүй бол тэмцлээ үргэлжлүүлнэ гэдгээ мэдэгдье гэлээ.

МЭМАҮЭХ-ны дарга Ч.Нарантуяа:

"Засгийн газар цалин нэмэх сургаар баяртай байсан эмч нарынхаа итгэлийг хөсөр хаяж байна. Эмч, ажилчдын нэмэгдлийг 30 хувиар нэмэгдсэн цалингаас тооцож олгохгүй бол ажил хаялтаа эхлүүлье гэдэг шаардлагыг ч тавьж байгаа. Цалингийн нэмэгдлийг далимдуулж, 9 хувийн цомхотголыг хийгээд эхэлсэн. 20-иодхон хүнтэй сумын ЭМТ-ийн үйлчлэгч, жолоочийг халах дээрээ тулж байна. Засгийн газар зөвшилцлийн хүрээнд цалин нэмэхгүй бол ахин ажил хаялт зарлана гэв.