Монгол-Казахстан хоёр улсын " Онцгой байдлын салбар" дахь хамтын ажиллагааны уулзалт боллоо

Монгол Улсын Шадар сайдын хувиар холбогдох албаны төлөөлөгчдийн хамтаар Бүгд Найрамдах Казахстан Улсын Астана хотод ажлын айлчлал хийж тус улсын Онцгой байдлын сайд, дэслэгч генерал Чингис Ариновтой уулзалт хийлээ.

Уулзалтаар хоёр улсын онцгой байдлын бодлого, гамшгийн эрсдэлийн удирдлагын институтийн тогтолцоо, байгалийн гамшиг, эрсдэл, газар хөдлөлтийн бэлэн байдал, хариу арга хэмжээний чадавхыг бэхжүүлэх асуудлаар дэлгэрэнгүй санал солилцсон юм.

Мөн бүс нутгийн хэмжээнд гамшгийн эрсдэлийг бууруулах, хамтарсан сургалт, дадлага сургууль зохион байгуулах, мэргэжилтэн солилцох, онцгой байдлын салбарт мэдээлэл, технологийн хамтын ажиллагааг өргөжүүлэх нь чухал болохыг онцолж, 2007 онд байгуулсан онцгой байдлын асуудлаарх хоёр талын хамтын ажиллагааны гэрээг шинэчилж, хэрэгжилтийг хангахад хамтран ажиллахаар санал нэгдлээ.

Мөн Монгол Улс, ОХУ, Бүгд Найрамдах Казахстан Улсын гурван талт хэлэлцээрийн хүрээнд Баян-Өлгий–Казахстан чиглэлд шинээр авто зам нээх асуудлаарх хэлэлцээ амжилттай үргэлжилж, талууд зохих түвшинд харилцан ойлголцолд хүрч, гуравдагч талуудтай зөвшилцөхөөр боллоо

Уулзалтын төгсгөлд харилцан ашигтай, бүтээлч хамтын ажиллагааг улам өргөжүүлэн, хөгжүүлэх саналтай байгаагаа илэрхийлж Казахстаны төлөөлөгчдийг Монгол Улсад айлчлахыг урилаа.