Судалгаагаар интроверт хүмүүсийн тархи өдөөлтөд илүү мэдрэмтгий байдаг

Интроверт хүмүүс яагаад ганцаараа байх үедээ “цэнэглэгддэг” вэ?

Зарим хүмүүс ядарсан үедээ найзуудтайгаа уулзаж, яриад, гадуур гараад сэргэдэг. Харин зарим нь яг эсрэгээрээ. Хүмүүсээс холдож, чимээгүй сууж байж л амардаг. Үүнийг залхуурал, зожиг зан гэж ойлгох нь элбэг. Гэвч үнэндээ энэ бол тархины энерги зарцуулалтын ялгаа юм.

Сэтгэл судлалд үүнийг албан ёсны нэр томьёо биш ч “Introvert Battery” гэж зүйрлэн ярьдаг. Дотоод чиг баримжаатай (introverted) хүмүүсийн хувьд нийгмийн харилцаа нь энерги зарцуулдаг үйлдэл байдаг. Ярилцах, дасан зохицох, орчинд тохирох, бусдын сэтгэл хөдлөлийг унших зэрэг нь тархинд тасралтгүй ачаалал өгдөг.

Тиймээс интроверт хүн ганцаараа байх үедээ “тасарч байгаа” биш, харин дотоод батарейгаа цэнэглэж байдаг. Чимээгүй орчин, ганцаардал, ном унших, алхах, бодох эдгээр нь тархины сэргэлтийн горим юм.

Судалгаагаар интроверт хүмүүсийн тархи өдөөлтөд илүү мэдрэмтгий байдаг тул хэт олон хүн, дуу чимээ, яриа нь хурдан ядраадаг. Харин ганцаараа байх үед тархины ачаалал буурч, бодол цэгцэрч, сэтгэл тогтворждог.

Бүтэн өдөр уулзалт, яриа, харилцаанд орсны дараа “ганц хоёр цаг хэнтэй ч ярихгүй суух” хүсэл төрнө. Энэ бол харилцаанаас зугтах биш өөрийгөө хэвийн байдалд нь буцаах оролдлого юм.

Introvert Battery гэдэг ойлголт нэг зүйлийг сануулдаг. Бүх хүн адилхан цэнэглэгддэггүй. Хэн нэгэнд тайван байдал хэрэгтэй байна гэдэг нь чамд дургүйдээ биш, өөрийгөө хамгаалж байгаагийн илрэл байж болно.

Өөрөөсөө нэг асуулт асуугаад үзээрэй:
“Би ядарсан үедээ юунаас цэнэг авдаг вэ?”